លោក Jurgen Klopp អ្នកចាត់ការក្រុម Liverpool បាននិយាយថាប្រកួតនៅពានរង្វាន់ UEFA Champions League ត្រូវតែទទួលបានជ័យជម្នះដាច់ខាត ដើម្បីបង្ហាញពីភាពប្រសើរឡើងនៃក្រុមឡើងវិញ។
ក្រុម Liverpool លេងមិនបានល្អសោះក្នុងការប្រកួតក្នុងលីគកន្លងមក ដោយស្ថិតនៅពាក់កណ្ដាលតារាង និងដាច់ឆ្ងាយបន្ដិចដែរពីក្រុមកំពូលតារាង Arsenal ។ តែយ៉ាងណាមិញ បើតាមសម្ដីរបស់លោក Klopp គឺលោកមិនបារម្ភច្រើននោះទេចំពោះសមត្ថភាពក្រុម ដោយគ្រាន់តែត្រូវការពេលវេលាដើម្បីពង្រឹងស្មារតី និងផ្លាស់ប្ដូរក្បួនលេងបន្ដិចប៉ុណ្ណោះ។ ជាក់ស្ដែងប្រកួតទល់ក្រុម Rangers នៅយប់ម៉ោង២រំលងអាធ្រាត្រនេះ លោកជឿជាក់ថា Liverpool នឹងទទួលបានជ័យជម្នះ។
អ្នកចាត់ការសញ្ជាតិអាល្លឺម៉ង់បាននិយាយថា៖ “យើងត្រូវផ្ដោតអារម្មណ៍ឡើងវិញចំពោះការលេងកន្លងមក។ ក្រុមទាំងមូលហាក់លេងមិនទាន់យល់ចិត្តគ្នានោះទេ។ ពួកគេត្រូវគិតឡើងវិញ ក្រុមទាំងមូលត្រូវកែប្រែទម្រង់លេង។ យើងអាចធ្វើឱ្យល្អឡើងវិញនៅពេលយើងដោះស្រាយបញ្ហាបានរូចរាល់”៕