មធ្យោបាយក្នុងការព្យាបាលខ្លួនឯង សម្រាប់កីឡាករម្នាក់ៗគឺមានលក្ខណៈខុសប្លែកពីគ្នា យ៉ាងណាគេចាប់អារម្មណ៍លើរបៀបមួយ ដែលខ្មែរយើងស្គាល់ថាជាការ ជប់ខ្យល់ ខណៈភាសាបច្ចេកទេសនៅឯស្រុកក្រៅគេហៅថា ‘Hijama’។
តើវិធីនេះ បានជួយអ្វីខ្លះដល់កីឡាករបាល់ទាត់ ហើយតារាឆ្នើមរូបណាខ្លះ ដែលធ្លាប់អនុវត្តវា? តោះទៅតាមដានជាមួយទំព័រ CTS SPROT នៅខាងក្រោម៖
តើអ្វីទៅជា ‘Hijama’?
វាជាវិធីព្យាបាលដោយប្រើប្រាស់ពែងថ្ម ហើយមានដើមកំណើតចេញពីប្រទេសចិន។ មកដល់សម័យកាលទំនើប គេមានឧបករណ៍ប្រើប្រាស់មានក្បួនខ្នាតត្រឹមត្រូវ ដោយប្រើពែងពិសេសមកដាក់លើខ្នង ហើយគេប្រើឧបករណ៍មួយដើម្បីបឺតខ្យល់ក្តៅ នាំឲ្យមានលំហូរឈាម ជាហេតុបន្សល់ស្នាមរង្វង់ជាំមួយនៅលើស្បែក ក្រោយការព្យាបាលរួច។ របៀបព្យាបាលបុរាណមួយនេះ រមែងប្រទះឃើញប្រើប្រាស់ញឹកញាប់នៅតំបន់អាស៊ី ក៏ដូចជាអឺរ៉ុបខាងកើត មជ្ឈិមបូព៌ា និងសូម្បីតែអាមេរិកឡាទីន។
តើមានកីឡាករណាខ្លះធ្លាប់ប្រើប្រាស់វា?
បើកីឡាករនៅកម្ពុជាប្រហែលជាមានច្រើន តែយើងសូមលើករូបភាពច្បាស់ការមួយ ធ្លាប់បង្ហោះចែករំលែកចេញពីគណនីកីឡាករលេងតំណែងបម្រើ គឺធារី ចន្ថាប៊ីន។ សមាជិកក្លឹបវិសាខា បានទទួលការព្យាបាល Hijama ឬជប់ខ្យល់ជាលើកដំបូង កាលពីឆ្នាំ ២០១៩ ហើយលោកបង្ហើបថា ហាក់ទទួលបានអារម្មណ៍ល្អ និងធូរស្បើយឡើងនៅថ្ងៃបន្ទាប់។
ចំណែកឯកីឡាករធំៗនៅតំបន់អឺរ៉ុប យើងចាប់អារម្មណ៍ Karim Benzema ហាក់សកម្មញឹកញាប់ជាងគេ ជាមួយវិធីព្យាបាលរបៀបនេះ ស្របពេលដែលតារាឆ្នើមប្រេស៊ីល Neymar Jr ក៏ធ្លាប់សាកល្បងផងដែរ ដូចគ្នានឹង Riyad Mahrez រាងខុសប្លែកពីគេបន្តិច មិនមែនជប់ខ្យល់លើសាច់ខ្នងនោះទេ តែបែរជប់លើសាច់ភ្លៅទៅវិញ។
ជាងនេះក៏ធ្លាប់មានអត្តពលិកលើវិញ្ញាសាហែលទឹកនៅព្រឹត្តិការណ៍កីឡាអូឡាំពិក លោក Michael Phelps, អ្នកវាយគុណចម្រុះ Anthony Joshua, Khabib Nurmagomedov និង Conor McGregor ជាដើម។
តើវាផ្តល់ប្រយោជន៍អ្វីខ្លះសម្រាប់កីឡាករបាល់ទាត់?
លើផ្នែកវេជ្ជសាស្ត្រទូទៅ ការជប់ខ្យល់ វាអាចជួយព្យាបាលជំងឺឈឺខ្នងរ៉ាំរ៉ៃ គ្រុនក្តៅ ជួយប្រព័ន្ធរំលាយអាហារ ជួយការកើនឡើងសម្ពាធឈាមខ្ពស់ និងសូម្បីតែភាពគ្មានកូនជាដើម។
តែបើសំដៅលើកីឡាករបាល់ទាត់ ដូចជា Benzema ដូចចន្ថាប៊ីនជាដើម គឺជួយឲ្យពួកគាត់ទទួលបានអារម្មណ៍ស្រស់ស្រាយល្អ អាចឲ្យឈាមរត់បានស្រួល និងអ្វីដែលសំខាន់បំផុត ជួយឲ្យរាងកាយដែលទទួលរងការឈឺចាប់លើទីលាន រមួលសាច់ដុំឡើងរឹង មកប្រែជាធូរស្បើយបានឆាប់រហ័សជាងការសម្រាកធម្មតា។ ទាំងអស់នេះហើយជាមូលហេតុ ដែលអត្តពលិកជាច្រើន ជាពិសេសកីឡាករបាល់ទាត់ជ្រើសប្រើវិធីព្យាបាល Hajima បើទោះបីដឹងថា ក្រោយព្យាបាលហើយត្រូវបន្សល់ស្លាកស្នាមអាក្រក់ជាប់លើរាងកាយក៏ដោយ៕
ប្រភព៖ បរទេស