លោក Pep Guardiola បានបន្ទោសកូនក្រុមដែលរកបានត្រឹមតែ៦គ្រាប់ប៉ុណ្ណោះក្នុងការប្រកួតទល់ក្រុមបិសាចក្រហម Manchester United នៅយប់មិញនេះ។
ជំនួប Manchester Derby បានបញ្ចប់ទៅក្នុងលទ្ធផល City យកឈ្នះ United ៦-៣។ ដោយក្រុមម្ចាស់ផ្ទះ Man City របស់លោក Pep គ្រប់គ្រងការប្រកួតពេញតែម្ដង ដោយតង់ទី១រកបាន៤គ្រាប់ និងតង់ទី២រកបាន២គ្រាប់ទៀត។ ខណៈដែល៣គ្រាប់របស់ United វិញកើតឡើងនៅតង់ទី២ទាំងអស់។ ជាមួយនឹងលទ្ធផលនៃការប្រកួតនេះដែរ បើតាមសម្ដីរបស់លោក Pep អះអាងថាលោកមិនទាន់ពេញចិត្តនោះទេ។ សមាជិកក្រុមនៅមានចន្លោះប្រហោងច្រើនដែលត្រូវបំពេញបន្ថែមទៀត ពួកគេគួរតែអាចរកបានច្រើនជាង៦គ្រាប់ក្នុងប្រកួតនេះ។
លោក Pep បន្ដថា៖ “គ្មានអ្វីដែលល្អឥតខ្ចោះនោះទេ ប៉ុន្ដែយើងនឹងកែប្រែបន្ដទៀត។ យើងធ្វើបានល្អហើយ យើងអាចនឹងធ្វើបានល្អជាងនេះទៀត។ មានកីឡាករច្រើននាក់ខ្ជិលលេងនៅពេលនាំមុខ។ នេះមិនមែនជារឿងល្អទេ យើងត្រូវតែកែសម្រូលលើរឿងនេះឡើងវិញ យើងត្រូវតែលេងឱ្យអស់ពីសមត្ថភាព”៕