រដូវកាលថ្មី Premier League មានរឿងចម្លែកកើតឡើងជាច្រើន ដោយក្រុមខ្សោយពីមុនបែរជាឡើងជើង ជួនពេលក្រុមល្អៗបែរជាធ្លាក់កូដមិនគួរឲ្យជឿ។ ដូច Arsenal បានបន្តក្តីសង្ឃឹមលើកពានតាមរយៈការយកឈ្នះ ៣-១ ទៅលើ Tottenham Hotspur ហើយ Liverpool ផុតផើយប៊ិះតែនឹងចាញ់ Brighton ធ្លាក់មកឈរលេខ ៩ មាន ១០ ពិន្ទុ កាលពីយប់មិញ។
ក្រុមដឹកនាំដោយលោក Jurgen Klopp លេងបានត្រឹមស្មើក្នុងទឹកដីខ្លួនឯង ៣-៣ ទល់ Brighton ដោយគ្រាប់បាល់កើតចេញពី Roberto Firmino ពីរគ្រាប់ និងបានបាល់ Own Goal ពី Adam Webster មួយគ្រាប់ ខណៈក្រុមភ្ញៀវ កើតគ្រាប់បាល់ Hat-trick ពីកីឡាករ Leandro Trossard។
មានចំណុចគួរឲ្យចាប់អារម្មណ៍ ២ នៅប្រកួតយប់មិញ ដោយ ១) គឺ Anfield ត្រូវបានគេលុបឈ្មោះ លែងជាទីលានមរណៈគួរឲ្យខ្លាចដូចមុន និងទី ២) ខ្សែការពារ Trent Alexander-Arnold ហាក់ធ្លាក់ទម្រង់លេង មិនខុសពីពាក្យរិះគន់ និងកំពុងចូលដានចាស់ Harry Maguire របស់ក្លឹប Man Utd។
ដូចគ្នាយើងបានដឹង ប៉ុន្មានឆ្នាំមកហើយ ដូចការលេងទម្លាក់ Barcelona នៅ UCL នារដូវកាល ២០១៨/១៩ Anfield ស្ថិតក្នុងទីក្រុង Merseyside ចក្រភពអង់គ្លេស ត្រូវបានគេដាក់រហស្សនាមជា “ទីលានមរណៈ” ដែលមិនងាយមានក្រុមគូប្រជែងណា អាចបញ្ចប់ទីរកគ្រាប់បាល់ ឬយកឈ្នះនៅទីនោះបានស្រួលៗឡើយ។
ក៏ប៉ុន្តែនៅពេលចុងក្រោយ Anfield ត្រឹមជាកីឡដ្ឋានធម្មតាៗ មិនបានធ្វើឲ្យខ្លាចរអាដល់ក្រុមដទៃអ្វីឡើយ ជាក់ស្តែងការប្រកួតក្នុងដី Liverpool ៤ ប្រកួតរដូវកាលនេះ ឈ្នះ ២ ស្មើ ២ ហើយរបូតដល់ទៅ ៥ គ្រាប់។ អ្វីដែលសំខាន់ កាលពីយប់មិញ ក៏អាចកើតមានគ្រាប់បាល់ Hat-trick ជាថ្មី ក្រោយខកខានអស់រយៈពេល ១៣ ឆ្នាំនៅ Anfield។
ខ្សែប្រយុទ្ធបែលហ្សិក Leandro Trossard បានក្លាយជាកីឡាករដំបូង រកបាន Hat-trick ទល់ Liverpool នៅ Anfield គាស់ឲ្យកើតឡើងម្តងទៀត ក្រោយខកខានតាំងពីជំនាន់អតីតកីឡាករ Arsenal គឺ Andrey Arshavin ធ្វើបាននៅឆ្នាំ ២០០៩។
ដោយឡែកងាកទៅតំបន់ការពារក្រោម Virgil van Dijk និង Trent Alexander-Arnold ជាមុខព្រួញដែលអ្នកគាំទ្រកំពុងដាក់បន្ទុក ជាពិសេសគឺខ្សែការពារស្លាបសញ្ជាតិអង់គ្លេស ដែលយប់មិញភ្លាត់ច្រើនណាស់ ទាំងបច្ចេកទេសការពារ និងការក្រុសបាល់។ Arnold កន្លងមកត្រូវបានគេរិះគន់ ថាលេងការពារ តែហាក់ព្យាយាមសម្រុកទៅខាងលើច្រើនពេក ដល់ថ្នាក់ពេលខ្លះ ប្រឹងតែរត់ទៅមុខ លែងចង់ការពារនៅខាងក្រោយ ហើយរបៀបលេងនេះ បានតែជាមួយប្រព័ន្ធដឹកនាំលោក Jurgen Klopp មួយគត់ បើជាមួយគ្រូផ្សេងដឹងតែចប់ហើយ។
ស្ថិតិកាលពីយប់មិញ Arnold ទទួលបានពិន្ទុវាយតម្លៃ ៦,៥ ដោយមានអត្រាបញ្ជូនបាល់ជោគជ័យត្រឹម ៧៦ ភាគរយ ហើយស៊ុត ៣ លើក បាញ់ចោល ដោយគ្មានចំគោលដៅ ខណៈការក្រុសបាល់ទៅមិត្តរួមក្រុម គឺបរាជ័យជាច្រើនលើកច្រើនសារ។ រីឯរបៀបការពារ ដែលមើលទៅរាងភ្លាត់មួយសារៗបែបនេះ ធ្វើឲ្យអ្នកគាំទ្រកំពុងបន្ថែមពាក្យទៅលើកីឡាករវ័យ ២៣ ឆ្នាំ ថាប្រហែលធ្លាក់ចូលដានរបស់ Harry Maguire ជាបណ្តើរៗហើយ។
គួរឲ្យដឹងដែរថា Liverpool នឹងកាន់តែទទួលសម្ពាធធ្ងន់ នៅប្រកួតបន្តបន្ទាប់ ជាក់ស្តែងរយៈពេល ១១ ថ្ងៃ ត្រូវលេង ៤ ប្រកួត មានពីរជើងនៅ UCL ទល់ក្លឹប Rangers និងប្រកួតធំ ២ នៅ Premier League ត្រូវប៉ះ Arsenal ថ្ងៃទី ៩ និងប៉ះ Man City ថ្ងៃទី ១៦ តុលា សុទ្ធសឹងមានផ្សាយបន្តផ្ទាល់លើទំព័រ CTS SPORT៕
ប្រភព៖ បរទេស