នៅថ្ងៃអាទិត្យស្អែកនេះ ជំនួបពិសេស Manchester Derby នឹងចូលមកដល់ ដោយក្លឹបម្ចាស់ជើងឯក Man City ត្រូវបើកកីឡដ្ឋាន Etihad ស្វាគមន៍ភ្ញៀវ Man United ជាក្លឹបខកខានការប្រកួតនៅ Premier League អស់ពេលជិត ១ ខែ។ ក៏ជឿថាមានមតិចម្រូងចម្រាស និងការយល់ឃើញខុសប្លែកគ្នា ជុំវិញការប្រកួតដ៏កក្រើកខាងមុខ ដូច្នេះ CTS SPORT ក៏សូមចូលរួមបញ្ចេញមតិយោបល់ តាមរយៈការព្យាករណ៍ប្រព័ន្ធកីឡាករ លទ្ធផលគ្រាប់បាល់ និងបង្ហាញស្ថិតិ កំណត់ត្រាមួយចំនួន ដែលអាចកើតឡើងនៅថ្ងៃនោះ៖
១) ស្ថានភាពកីឡាករនិងជម្រើស ១១ នាក់ដំបូង
សម្រាប់ City ជាម្ចាស់ផ្ទះ ហាក់មានភាពពេញលក្ខណៈល្អជាង តាំងពីតំបន់ការពារដល់ប្រយុទ្ធ ខណៈដែល United ជាភ្ញៀវ យើងមើលឃើញពីកង្វះខាតនៅតំបន់ប្រយុទ្ធ ដែលមិនទាន់ជាត្រៀមខ្លួនរួចរាល់ ១០០ ភាគរយនៅឡើយ តែបើតំបន់ការពារ និងបម្រើ គឺមើលឃើញថាល្អប្រសើរច្រើន។
ចំពោះស្ថានភាពខាងក្រុមលោក Pep Guardiola មានខ្សែការពារ Aymeric Laporte និង Kyle Walker ត្រលប់មកវិញ នាំឲ្យជម្រើសក្នុងដៃ កាន់តែមានច្រើនបន្ថែម ស្របពេលដែល John Stones និង Kalvin Phillips ត្រូវឈរក្រៅជួរ។ រីឯ United នៅតំបន់ការពារ ត្រូវអវត្តមាន Harry Maguire ហើយតំបន់ខាងលើ Marcus Rashford ដែលរបួសតាំងពីប្រកួតទល់ Arsenal ក៏មិនច្បាស់ថាអាចបង្ហាញខ្លួនឬអត់នោះដែរ ដូចគ្នានឹង Anthony Martial ដ្បិតបានវិលមកហ្វឹកហាត់វិញក៏ដោយ នេះបើតាមការបញ្ជាក់ពីលោក Erik ten Hag ជាអ្នកចាត់ការ។
ជម្រើស ១១ នាក់ដំបូងអាចកើតឡើងរវាងក្រុមទាំងពីរ៖
Manchester City: Ederson; Walker, Akanji, Dias, Cancelo; Silva, Rodri, De Bruyne; Foden, Haaland, Grealish
Manchester United: De Gea; Dalot, Varane, Martinez, Malacia; Casemiro, Eriksen; Antony, Fernandes, Sancho; Ronaldo
២) ស្ថិតិនិងកំណត់ត្រា
៥ ប្រកួតចុងក្រោយនៅ Premier League ក៏ City មានប្រៀបជាង ទាំងចំនួនគ្រាប់បាល់បញ្ចូលទី និងគ្រាប់បាល់របូត។ មេឃខៀវ ឈ្នះ ៣ ស្មើ ២ រកបាន ១៧ គ្រាប់ របូត ៦ គ្រាប់ ជួនពេលដែលបិសាចក្រហម ឈ្នះ ៤ ចាញ់ ១ រកបាន ៧ គ្រាប់ របូត ៦ គ្រាប់។
ក្រឡេកទៅតារាងចំណាត់ថ្នាក់នៅ Premier League ខាង City ឈរលេខ ២ មាន ១៧ ពិន្ទុ ហើយមានឱកាសអាចត្រលប់ទៅកំពូលតារាង បើអាចយកឈ្នះ United ក្នុងករណីដែល Arsenal របូតពិន្ទុ។ ខណៈ United កំពុងឈរលេខ ៥ មាន ១២ ពិន្ទុ ក៏សង្ឃឹមអាចឆ្លងចូល Top 4 ប្រសិនទទួលបានជ័យជម្នះ។
- កំណត់ត្រាធំមួយសម្រាប់ Erling Haaland គឺគេនឹងអាចក្លាយជាកីឡាករដំបូងនៅ Premier League ដែលអាចរកបានគ្រាប់បាល់ Hat-trick ក្នុងដី ៣ ប្រកួតជាប់ បន្ទាប់ការរកបាន ៣ គ្រាប់ទល់ភ្ញៀវ Nottingham Forest និង Crystal Palace កន្លងមក
- Man City រដូវកាលចាស់ ទាំងពីរជើង បានយកឈ្នះសរុបគ្រាប់បាល់ ៦-១ ទៅលើ Man Utd នាំឲ្យក្រុមលោក Pep Guardiola អាចមានឱកាសឈ្នះ ៣ ប្រកួតជាប់ ក្រោយខកខានកើតមានតាំងឆ្នាំ ២០១៤
- គួរឲ្យខ្លាចបំផុត ត្រង់ថា City ឈ្នះ ៧ ប្រកួតជាប់ហើយ នៅទឹកដី Etihad Stadium ក្នុងក្របខ័ណ្ឌ Premier League ដោយប្រកួតនីមួយៗយ៉ាងតូចក៏រកបាន ៣ គ្រាប់ដែរ
- សម្រាប់ Man Utd ស្ថិតិល្អគួរឲ្យចាប់អារម្មណ៍ គឺក្រោយចាញ់ ៤ ប្រកួតជាប់ក្នុងលីគ បន្ទាប់មកក៏ត្រលប់មកឈ្នះ ៤ ប្រកួតជាប់វិញ
យ៉ាងណាបើនិយាយស្ថិតិជារួម តាំងពីដើមមក ១៨៧ លើកប៉ះគ្នា United ឈ្នះច្រើនជាង មាន ៧៧ លើក ស្មើ ៥៣ លើក និងចាញ់ ៥៧ លើក
៣) ការព្យាករណ៍គ្រាប់បាល់
បើទោះបីកន្លងមក United បានយកឈ្នះទៅលើ Arsenal និង Liverpool តែយើងនៅតែមើលឃើញ ពីភាពមិនប្រាកដប្រជានៅតំបន់ប្រយុទ្ធក្រោមការដឹកនាំរបស់លោក Erik ten Hag ហើយការដែលមកប៉ះគីឡូធ្ងន់ដូចជា Man City ជាក្រុមល្អសឹងគ្រប់តំណែង និងជាក្រុមរមែងកើតមានគ្រាប់បាល់ច្រើន សឹងគ្រប់ប្រកួត ក៏នាំឲ្យយើងហ៊ានសន្មតថា គូនេះនឹងកើតមានគ្រាប់បាល់ Over លើសពី ២.៥ គ្រាប់ ជាមួយលទ្ធផលព្យាករណ៍ គឺ City នឹងអាចយកឈ្នះ ២-១ ឬ ៣-១ ទៅលើ Man Utd។ ចុះសម្រាប់យោបល់គ្នាយើងវិញ យល់ឃើញបែបណា? កុំភ្លេចចាំតាមដានការផ្សាយផ្ទាល់ជាមួយគ្នាលើទំព័រ CTS SPORT នៅវេលាថ្ងៃអាទិត្យស្អែក ម៉ោង ០៨:០០ នាទីយប់៕