Alfie Haaland ដែលជាឪពុករបស់កំពូលតារាឆ្នើមរបស់ក្រុម Manchester City លោក Erling Haaland បានគូសបញ្ជាក់ពីពេលវេលាអាជីពរបស់កូនប្រុសគាត់នៅឯក្លឹបមួយនេះ ក្រោយពេលដែលកូនប្រុសទើបតែទៅចូលរួមជាមួយក្លឹបនេះមិនទាន់បានមួយរដូវកាលផង។
អ្នកគាំទ្រក្លឹប City ប្រហែលជាមិនបានឃើញកីឡាកររូបនេះនៅក្នុងក្លឹបសម្រាប់រយៈពេលយូរនោះទេ បើទោះបីជា Haaland បានចុះកិច្ចសន្យារយៈពេលប្រាំឆ្នាំជាមួយក្រុមការពារតំណែងជើងឯកអង់គ្លេសយ៉ាងនាក្តី។
បើតាម Alfie Haaland ដែលជាអតីតកីឡាកររបស់ City ផ្ទាល់ កូនប្រុសរបស់គាត់ប្រហែលជាមិនស្នាក់នៅក្លឹបលើសពី ៣ ឬ ៤ ឆ្នាំនោះទេ ខណៈដែលផែនការរបស់គាត់គឺចង់ឲ្យកូនលេងនៅលីគកំពូលទាំងប្រាំនៅអឺរ៉ុប។
គាត់បាននិយាយថា៖
“ខ្ញុំគិតថា Erling ចង់បង្ហាញពីសមត្ថភាពរបស់គាត់នៅក្នុងលីគទាំងអស់។ ដូច្នេះគាត់អាចស្នាក់នៅទីនោះ (Manchester City) រយៈពេល ៣ ឬ ៤ ឆ្នាំច្រើនបំផុត។ ជាឧទាហរណ៍ ២ ឆ្នាំកន្លះនៅប្រទេសអាឡឺម៉ង់ ពីរឆ្នាំកន្លះ នៅអង់គ្លេស ហើយបន្ទាប់មកនៅអេស្ប៉ាញ អ៊ីតាលី”។
គាត់បានបន្ថែមទៀតថា៖
“នៅក្នុងបញ្ជីរបស់យើង ខ្ញុំគិតថា City គឺជាក្រុមល្អបំផុត។ Bayern Munich គឺលេខ ២។ យើងមាន Real Madrid លេខ ៣ Paris Saint-Germain លេខ ៤។ យើងក៏មានក្រុមអង់គ្លេសមួយចំនួនក្រៅពី Man City ដែលល្អផងដែរ ដូចជា Liverpool និង Chelsea ក៏មាន Barcelona ផងដែរ។ ពួកគេល្អដូចគ្នា”៕
ប្រភព៖ Sportskeeda