ក្រុមតោខៀវ Chelsea នឹងត្រូវអវត្ដមានកីឡាករសំខាន់ៗដល់ទៅ៤នាក់ឯណោះក្នុងការប្រកួតទល់ក្រុម Crystal Palace នៅម៉ោង៩យប់នេះ។
ការប្រកួតទល់ Crystal Palace នឹងក្លាយជាប្រកួតដំបូងក្នុងលីគរបស់លោក Potter ហើយ ក្រោយពីត្រូវបានតែងតាំងជាអ្នកចាត់ការថ្មីក្រុមនេះ។ យ៉ាងណាមិញ ប្រកួតដំបូងលោកមានបញ្ហាកីឡាកររបួសទៅហើយ។ ជាក់ស្ដែងនៅរាត្រីនេះមានកីឡាករដល់ទៅ៤នាក់នឹងអវត្ដមានគឺអ្នកចាំទី Edouard Mendy ខ្សែបម្រើ N’Golo Kante ខ្សែការពារ Marc Cucurella និងខ្សែបម្រើ Chukwuemeka ។ អ្នកចាំទី Edouard Mendy ខ្សែបម្រើ N’Golo Kante ដែលរងរបួសនោះបានចូលហាត់វិញតិចៗហើយ តែមិនទាន់អាចពេញកម្លាំងលេងបាននៅឡើយទេ។ ស្របពេលខ្សែការពារ Marc Cucurella និងខ្សែបម្រើ Chukwuemeka ឈឺ។
ចំណែកឯខ្សែប្រយុទ្ធ Pierre-Emerick Aubameyang វិញនោះ នឹងអាចចូលលេងប្រកួតដំបូងក្នុងលីគឱ្យក្រុម Chelsea បានហើយ ក្រោយពីរូបគេត្រូវបានផ្ទេរពីក្រុម Barcelona មកលេងនៅ Premier League វិញ។ ក្រុម Chelsea នារដូវកាលនេះ ឈរនៅលេខ៧ក្នុងតារាង ដោយទើបមាន១០ពិន្ទុឆ្លងកាត់៦ប្រកួត៕