ការដោះដូរកីឡាករ នឹងវិលទៅភាពមមាញឹកជាថ្មី នៅកំឡុងខែមករា ឆ្នាំ ២០២៣ ខាងមុខ តែគេជឿថា ដំណើរការចរចា ក៏ដូចជាកិច្ចព្រមព្រៀងផ្សេងៗអាចនឹងកើតឡើងជាបណ្តើរៗ ក្រោយការបញ្ចប់ព្រឹត្តិការណ៍ FIFA World Cup នៅឯចុងឆ្នាំ។ ងាកមកស្ថានភាពក្លឹប Real Madrid ចំពោះរឿងរ៉ាវគួរឲ្យចាប់អារម្មណ៍បំផុត ពាក់ព័ន្ធនឹងចចាមអារ៉ាមចង់បានកីឡាករថ្មី គឺផ្តោតលើ ២ រូបជាអាទិភាព មានកីឡាករលេងតំណែងការពារស្លាប និងបម្រើការពារ។
១) Jude Bellingham
បើអ្នកតាមដានព័ត៌មានជាប់លើទំព័រ CTS SPORT ប្រាកដជាបានឃើញខ្លះៗហើយ ពាក់ព័ន្ធការចុះផ្សាយអំពីកីឡាករសញ្ជាតិអង់គ្លេស។ ជាការពិតមានក្លឹបធំៗច្រើនណាស់ បាក់ចិត្តមកលើគ្រាប់ពេជ្រកំពុងភ្លឺចិញ្ចាចរបស់ក្លឹប Borussia Dortmund ហើយក៏មានភាគរយអាចក្លាយជាកីឡាករអង់គ្លេសថ្លៃបំផុតផងដែរ។
តាមចចាមអារ៉ាមចុះផ្សាយថា Liverpool, Man City, Real Madrid, Chelsea និង Man Utd ជាដើម បានដាក់គោលដៅទៅលើខ្សែបម្រើវ័យ ១៩ ឆ្នាំខាងលើ តែពាក់ព័ន្ធការសម្រេចបែបណារបស់កីឡាករ ក៏ដូចជាតម្លៃច្បាស់ការ ដាក់ចេញពីភាគីក្លឹបអាណាព្យាបាល ប្រហែលត្រូវរង់ចាំដល់ World Cup ចប់រួចរាល់។
តែបើតាមការព្យាករណ៍ជាមុន Bellingham អាចមានតម្លៃផ្តាច់កុងត្រា ១៥០ លានអឺរ៉ូ ហើយ Dortmund ប្រាកដណាស់ នឹងដើរគន្លងចាស់ដូចការផ្ទេរ Erling Haaland ពោលមិនទទួលការចរចាតម្លៃថ្មីអ្វីទាំងអស់ ជារួមបើក្លឹបណាហ៊ានឲ្យដល់ទំហំចង់បាន Release Clause នោះនឹងព្រមលក់ចេញភ្លែត។
ចំពោះអធិរាជស ការដែលសម្លឹងតាមមើល Bellingham ព្រោះក្លឹបមើលឃើញឆ្ងាយលើផែនការណ៍យូរអង្វែង ក្នុងការដុសខាត់អភិវឌ្ឍបន្ថែម ទុកស្នងជើង Casemiro ដែលទើបចែកផ្លូវ ក៏ដូចជាត្រៀមបំពេញតំបន់បម្រើរជ្ជកាលថ្មី ក្រោយអស់ពី Toni Kroos និង Luka Modric ដែលមាន Federico Valverde, Eduardo Camavinga និង Aurelien Tchouameni កំពុងឈរជើងស្រាប់។
២) Joao Cancelo
ព័ត៌មានកំពុងកក្រើកថ្ងៃនេះ ដែលល្ហៀងៗថាក្លឹបម្ចាស់ដី Bernabeu ចង់សាកល្បងអូសទាញចិត្តខ្សែការពារស្លាបស្តាំរបស់ Manchester City នៅទីផ្សាររដូវក្តៅ ឆ្នាំ ២០២៣។ បើតាមរបាយការណ៍ពី AS ចុះផ្សាយថា ដោយមើលឃើញពីកង្វះខាតនៅតំបន់ការពារស្លាបក្រោម ដែលសព្វថ្ងៃមានត្រឹម Dani Carvajal ជាជម្រើសតែមួយ ដូច្នេះក៏ចង់បន្ថែមចំណូលថ្មី ឲ្យមានការប្រកួតប្រជែងខ្លាំងជាងមុន។
ខ្សែការពារព័រទុយហ្គាល់ Cancelo សេសសល់កុងត្រាដល់ចុងខែមិថុនា ឆ្នាំ ២០២៧ ហើយអាចមានតម្លៃខ្លួនយ៉ាងហោចណាស់ ៥០ លានអឺរ៉ូ ឬអាចធ្លាក់ចុះ ឡើងខ្ពស់ជាងនោះ ស៊ីសងលើសមិទ្ធផលអាចសម្រេច នៅពេលខាងមុខ។
បញ្ជាក់ដែរថា កីឡាករវ័យ ២៨ ឆ្នាំខាងលើ ធ្លាប់បានភ្លក់បទពិសោធន៍នៅក្របខ័ណ្ឌ La Liga ម្តងរួចមកហើយ គ្រានោះឈរជើងឲ្យ Valencia ដែលបង្ហាញខ្លួន ៩១ ប្រកួត រកបាន ៤ គ្រាប់និង Assist ៩ លើក។ ក្រៅតែពីតំណែងការពារស្លាបស្តាំ កន្លងមកលោក Pep Guardiola ក៏ធ្លាប់ច្នៃប្រើ Cancelo នៅការពារស្លាបឆ្វេង និងបម្រើស្លាបស្តាំផងដែរ៕
ប្រភព៖ បរទេស