លោកស្រី Dolores Aveiro ម្ដាយរបស់ Cristiano Ronaldo បាននិយាយថាចង់ឃើញកូនប្រុសលេងឱ្យក្រុម Sporting ម្ដងទៀត មុនដង្ហើមចុងក្រោយ។
Ronaldo កំពុងប្រកបអាជីពនៅក្រុមបិសាចក្រហម Manchester United ហើយនេះជារដូវកាលចុងក្រោយនៃកុងត្រារបស់គេ២ឆ្នាំនៅទឹកដី Old Trafford ផងដែរ។ យ៉ាងណាមិញ នៅចប់កុងត្រានេះទៅ ខ្សែប្រយុទ្ធវ័យ៣៧ឆ្នាំនៅមិនទាន់ដឹងច្បាស់ថានឹងត្រូវទៅណាបន្ដទៀតទេ តែសម្រាប់ម្ដាយរបស់គេវិញ ចង់ឃើញកូនប្រុសត្រលប់ទៅលេងនៅក្លឹបដើមកំណើត Sporting នាប្រទេសព័រទុយហ្គាល់វិញ។ Sporting នេះហើយ ជាក្លឹបដំបូងនិងជាការចាប់ផ្ដើមរបស់ Ronaldo មុនពេលលោក Sir Alex Fugerson មើលឃើញសមត្ថភាពគេ និងនាំមកលេងនៅបិសាចក្រហម។
លោកស្រី Dolores Aveiro បាននិយាយថា៖ “Ronaldo ត្រូវត្រលប់ទៅលេងនៅព័រទុយហ្គាល់វិញ។ ប្រសិនបើខ្ញុំអាចសម្រេចចិត្តបាន កូនប្រុសរបស់ខ្ញុំនឹងពាក់អាវ Sporting ម្ដងទៀត។ ខ្ញុំបានប្រាប់ទៅ Ronaldo ថាមុនខ្ញុំស្លាប់ ខ្ញុំចង់ឃើញគាត់លេងនៅ Sporting ទៀត។ វាមិនអាចកើតឡើងនៅរដូវកាលនេះបាន ប៉ុន្តែវាអាចនឹងកើតឡើងនៅរដូវកាលក្រោយ។ ប្រសិនបើ Ronaldo មិនអាចធ្វើបាន កូនប្រុសរបស់គេ អាចនឹងធ្វើជំនួសឪពុកបានដើម្បីលេងឱ្យក្រុម Sporting”៕