ក្រុម Real Madrid បានបង្ហាញចំណាប់អារម្មណ៍ចង់បានខ្សែការពារស្លាប Joao Cancelo ពីក្រុម Manchester City នារដូវកាលទីផ្សារដោះដូរមកដល់ ក្នុងតម្លៃខ្លួនប្រមាណជា៤៥លានផោន។
ក្រុមអធិរាជស Real Madrid តែងតែដាក់គោលដៅមុន និងតាមដានជើងកីឡាករដែលពួកគេនឹងនាំចូលនៅរដូវកាលដោះដូរកីឡាករខាងមុខ។ ដោយឡែកនៅពេលនេះ ពួកគេបានមើលឃើញម្នាក់ទៀតហើយគឺ Cancelo របស់ក្រុម Man City ។ កីឡាករសញ្ជាតិព័រទុយហ្គាល់តែងតែទទួលបានទំនុកចិត្តជានិច្ចក្រោមការដឹកនាំរបស់លោក Pep រហូតដល់កុងត្រារបស់គេទើបបន្ដដល់ឆ្នាំ២០២៧ឯណោះ។ តែទោះជាយ៉ាងនេះក្ដី ក្រុមជើងឯក១៤សម័យនៅ UCL នៅតែជឿជាក់ថាពួកគេមានលក្ខខណ្ឌល្អគ្រប់គ្រាន់ដើម្បីនាំយក Cancelo មកបាន។
ការចង់បានកីឡាករស្លាបម្នាក់ដែលល្អនេះ ក៏ព្រោះតែក្រុម Real Madrid មើលឃើញថានៅឆ្នាំខាងមុខ ពួកគេនឹងបាត់ធនធានល្អមួយហើយ គឺ Carvajal ដែលនឹងឈានចូលដល់វ័យ៣១ឆ្នាំឆាប់ៗខាងមុខ។ ស្របពេល Ferland Mendy វិញ ក៏មិនច្បាស់ពីអនាគតរបស់ខ្លួនទៀតដែរ។ លោក Carlo Ancelotti ចង់ពង្រឹងតំបន់ការពាររបស់ពួកគេឱ្យរឹងម៉ាំជាងនេះទៀត៕