លោកAntonio Conte បានច្រានចោលរឿងដែលចុះផ្សាយថាខ្លួននឹងទៅដឹកនាំក្រុម Juventus នារដូវកាលក្រោយហើយ និងចោទថាវាជាការមិនឱ្យតម្លៃគ្នាសោះ នៅពេលចុះផ្សាយបែបនេះ។
ក្រុម Juventus ក្រោមការដឹកនាំរបស់លោក Massimiliano Allegri ឃើញថាធ្វើមិនសូវបានល្អនោះទេ ដោយបរាជ័យនៅលីគផង ហើយនៅពានរង្វាន់ UEFA Champions League ២ប្រកួតក្នុងពូល ចាញ់ទាំង២ប្រកួតបន្ថែមទៀត។ កត្ដានេះហើយ ទើបបានជាអ្នកគាំទ្រចង់ឱ្យក្លឹបដកអ្នកចាត់ការនេះចេញពីតំណែងហើយ យកលោក Conte មកដឹកនាំវិញ។ ប្រភពនៅអ៊ីតាលីជាច្រើនក៏ចុះផ្សាយព្រោងព្រាតថានៅរដូវកាលក្រោយ Conte អាចត្រលប់មកដឹកនាំក្រុមនៅអ៊ីតាលីនេះវិញផងដែរ។
ដោយសារតែបែបនេះហើយ ទើបអ្នកចាត់ការក្រុម Spurs ចេញមុខនិងច្រានចោលពាក្យសម្ដីទាំងនោះតែម្ដង។ លោក និយាយថាការចុះផ្សាយរឿងមិនពិតបែបនេះ វានឹងប៉ះពាល់ដល់កិត្ដិយសក្លឹបនិងលោកផ្ទាល់ផងដែរ ហើយវាក៏បានបង្ហាញពីការមិនគោរពលោក Allegri ដែលកំពុងកាន់តំណែងផងដែរ។ បច្ចុប្បន្ននេះ លោក ពេញចិត្តក្នុងការបន្ដដឹកនាំក្រុម Spurs មិនបានគិតពីរឿងចាកចេញអ្វីនោះទេ៕