នៅល្ងាចថ្ងៃទី២៨ ខែកញ្ញា ឆ្នាំ២០២២ នេះ កញ្ញា អ៊ូ បញ្ញាសុកិត្យា នាយិកាគ្រប់គ្រងក្លិបវិសាខាបានចាកចេញពីមាតុភូមិ ដើម្បីចូលរួមសិក្សាវគ្គ «គ្រប់គ្រងបាល់ទាត់ – Football Management នៃ UEFA Academy» រយៈពេល ១ឆ្នាំ នៅប្រទេសស្វីស ដែលរៀបចំដោយសហព័ន្ធកីឡាបាល់ទាត់អឺរ៉ុប (UEFA)។
ក្នុងនាមស្ដ្រីខ្មែរដំបូង ដែលទទួលបានឱកាសចូលរួមសិក្សាផ្នែកគ្រប់គ្រងបាល់ទាត់នៅ UEFA នេះ កញ្ញា អ៊ូ បញ្ញាសុកិត្យា បានសម្ដែងការសប្បាយរីករាយ និងថ្លែងអំណរគុណជាខ្លាំង ចំពោះលោកជំទាវប្រធានក្លិប កែ សួនសុភី ដែលបានផ្ដល់ឱកាសនេះដល់កញ្ញា ដើម្បីសិក្សារៀនសូត្រ ដកស្រង់បទពិសោធន៍ និងចំណេះដឹងថ្មីៗ សម្រាប់អភិវឌ្ឍន៍ខ្លួន ពិសេសដើម្បីបន្ដរួមចំណែកដឹកនាំ និងអភិវឌ្ឍន៍ក្លិបឲ្យកាន់តែរីកចម្រើនបន្ថែមទៀត។
រំលឹកថាវិសាខា កំពុងកសាងក្លឹបរបស់ខ្លួនឱ្យក្លាយជាក្លឹបអាជីពនិងទទួលស្គាល់ពីសំណាក់សហព័ន្ធទាល់ទាត់អាស៊ី និង FIFA ផ្ទាល់។ ជាក់ស្ដែង ពួកគេមានកីឡដ្ឋានតាមស្ដង់ដារអន្ដរជាតិមួយ ហើយរចនាសម្ព័ន្ធវិញក៏បានត្រឹមត្រូវអស់ហើយដែរ៕