អតីតកីឡាករ Antonio Cassano របស់អ៊ីតាលី បាននិយាយថាវាដល់ពេលដែល Cristiano Ronaldo គិតពីការចូលនិវត្តន៍ហើយ ក្រោយពីរូបគេមានទម្រង់លេងធ្លាក់ណាស់នារដូវកាលនេះ។
Ronaldo បានជាប់ជម្រើសដំបូងនៅ Manchester United បាន១ប្រកួតគត់ ក្រៅពីនោះសុទ្ធតែអង្គុយបម្រុង និងប្ដូរចូល។ ស្របពេលនៅជម្រើសជាតិព័រទុយហ្គាល់វិញ ក៏ខ្សែប្រយុទ្ធវ័យ៣៧ឆ្នាំនេះលេងមិនល្អផងដែរ ពោលគឺមានឱកាសល្អៗច្រើនណាស់ដើម្បីរកគ្រាប់ ប៉ុន្តែស៊ុតមិនសម្រេចទៅវិញ។ កត្ដាទាំងអស់នេះហើយ បានសបញ្ជាក់ថាអាចនឹងដល់ពេលដែលកំពូលកីឡាករលើលោកម្នាក់នេះគិតពីការចូលនិវត្តន៍ហើយ។
លោក Antonio Cassano បាននិយាយថា៖ “នៅចំណុចនេះ Cristiano គួរតែដឹងខ្លួនឯងច្បាស់ ហើយយល់ពីស្ថានភាព ប្រសិនបើអ្នកមិនអាចឈានដល់កម្រិតកំពូលទេ អ្នកគួរតែបិទហាងទៅ។ គាត់បានឈ្នះគ្រប់យ៉ាងទៅហើយ គាត់ជាកំពូលកីឡាករម្នាក់។ ឈប់ទៅ អ្នកគួរតែដល់ពេលសម្រាកហើយ ឬអ្នកចង់គ្រាន់តែរត់លើទីលានទៀត”៕