ចុងឆ្នាំសកម្មខ្លាំងសម្រាប់អ្នកគាំទ្របាល់ទាត់ មិនថាតែនៅលីគកំពូលអឺរ៉ុប និងការប្រកួតរវាងជម្រើសជាតិ។ ឆ្លងផុតខែចាស់ ផ្លាស់ចូលខែថ្មី ខែតុលា នឹងមានពេលវេលាពិសេស កើតឡើងនៅថ្ងៃតែមួយ ដែលជំនួបខ្នាតយក្ស ៤ គូលេងនៅថ្ងៃទី ១៦ ព្រមគ្នា បើយើងគិតតាមម៉ោងក្រៅប្រទេស៖
៤) Real Madrid ប៉ះ Barcelona
ដាក់ម៉ោងត្រូវចិត្តមួយទំហឹង សម្រាប់អ្នកគាំទ្រនៅអាស៊ី ដោយជំនួប El Clasico ជើងទី ១ រដូវកាលថ្មី កំណត់លេងនៅវេលាម៉ោង ០៩:១៥ នាទីយប់ ថ្ងៃអាទិត្យ ទី ១៦ តុលា មានផ្សាយផ្ទាល់លើទំព័រ CTS SPORT។
ជាប្រកួតដែលអ្នកមិនគួររំលង ព្រោះអីក្លឹបទាំងពីរ កំពុងប្រជែងគ្នាយ៉ាងប្រកិតនៅតារាងលីគកំពូលអេស្ប៉ាញ ដោយគិតត្រឹមជុំទី ៦ អធិរាជស នាំមុខលើអ្នកមានបុណ្យតែ ២ ពិន្ទុគត់។ យ៉ាងណាមុននេះ ក្រុមដឹកនាំដោយលោក Carlo Ancelotti ត្រូវមមាញឹកឆ្លងកាត់ ៤ ប្រកួតសិន ដូចការប៉ះ Osasuna, Getafe និង Shakhtar Donetsk ដល់ទៅពីរជើង។ ខណៈដែលក្រុមលោក Xavi Hernandez ត្រូវប៉ះ Mallorca, Celta Vigo និង Inter Milan នៅ UCL ពីរជើងដូចគ្នា។
៣) Union Berlin ប៉ះ Dortmund
ស្តាប់មួយភ្លែត អ្នកគិតថាគ្មានអ្វីពិសេសទេសម្រាប់គូនេះ ព្រោះមិនសូវមានវត្តមាន Superstar សំខាន់ៗ តែបើយើងមើលចំណាត់ថ្នាក់បច្ចុប្បន្ននៅ Bundesliga ក្រុមទាំងពីរ កំពុងបណ្តែតគ្នានៅចំណាត់ថ្នាក់កំពូល នាំមុខជើងឯករដូវកាលចាស់ Bayern Munich លើស ៣ ពិន្ទុ។
Union Berlin ជាក្រុមឈរលេខ ១ ត្រូវជួបក្រុមឈរលេខ ២ Dortmund នៅវេលាម៉ោង ១០:៣០ នាទីយប់ថ្ងៃអាទិត្យ ទី ១៦ តុលា។
២) Liverpool ប៉ះ Man City
ម៉ោងតែមួយថ្ងៃតែមួយ គឺ ១០:៣០ នាទីយប់ ដូចគ្នា ងាកមកក្របខ័ណ្ឌកំពូលអង់គ្លេស គឺមានជំនួបពិសេសនៅថ្ងៃអាទិត្យ ជាការជួបរវាងហង្សក្រហម Liverpool ទល់ក្រុមភ្ញៀវ មេឃខៀវ Man City។ យ៉ាងណាមុនការប្រកួតមកដល់ ក្រុមដឹកនាំដោយលោក Jurgen Klopp ត្រូវហែលការប្រកួតសំខាន់ ៤ សិន មានការប៉ះ Rangers ពីរជើងនៅ UCL និងការប៉ះក្រុមគីឡូធ្ងន់ Brighton ក៏ដូចជា Arsenal ខណៈ City ក៏មិនណយដែរ ដោយត្រូវជួប Man Utd នាថ្ងៃទី ០២ ខាងមុខ មុនទៅលេង UCL ទល់ Copenhagen និង Southampton។
១) PSG ប៉ះ Marseille
ក្លឹបល្អបំផុតទាំងពីរនៅលីគបារាំង ក៏ណាត់ជួបគ្នា នៅវេលាបន្ទាប់នោះ ម៉ោង ០១:៤៥ នាទីយប់ ឈានចូលថ្ងៃចន្ទ ទី ១៧ តុលា។ គិតត្រឹមជុំទី ៨ PSG ឈរលេខ ១ មាន ២២ ពិន្ទុ រីឯ Marseille ឈរលេខ ២ មាន ២០ ពិន្ទុ។
បើជ្រុលតែរាប់លីគកំពូលចំនួន ៤ ហើយ CTS SPORT ក៏សូមញាត់ថែមមួយគូទៀតនៅ Serie A ក៏ជាគូធំគួរសម ដោយ Lazio បើកកីឡដ្ឋានណាត់ជួប Udinese នាវេលាម៉ោង ០៨:០០ នាទីយប់ ថ្ងៃអាទិត្យ ទី ១៦ តុលា។ យើងពិតជាចង់ដឹង ដ្បិតអី Udinese រដូវកាលថ្មីកំពុងឡើងជើង រំកិលមកឈរលេខ ៣ បណ្ដោះអាសន្ន នាំមុខលើ Lazio ជាក្រុមឈរចំណាត់ថ្នាក់បន្ទាប់ ២ ពិន្ទុ៕
ប្រភព៖ បរទេស