លោកគ្រូ អេ ភូថង បានបង្ហាញការសប្បាយចិត្តយ៉ាងខ្លាំងនៅពេលកូនប្រុសទាំងពីររបស់លោកសុទ្ធតែបានយកឈ្នះលើកីឡាករថៃបានក្នុងការឡើងសង្វៀននៅទឹកដីថៃ។
អេ អាំម៉ារីន ភូថង និង ម៉ឺន មេឃា ដែលជាកូនប្រុសរបស់លោក អេ ភូថង សុទ្ធតែធ្វើបានល្អដូចគ្នាក្នុងការប្រកួតកន្លងទៅនេះ ដោយពួកគេទាំងពីរសុទ្ធតែអាចយកឈ្នះថៃបាន។ ជាពិសេស ម៉ឺន មេឃា ដែលផ្ដួលថៃឱ្យសន្លប់នៅយប់មិញ ធ្វើឱ្យអ្នកគាំទ្រកម្ពុជាពេញចិត្តយ៉ាងខ្លាំង។ ត្បិតអីកន្លងមក កីឡាករកម្ពុជាទៅវាយនៅថៃកម្រជោគជ័យណាស់។
ក្រោយពីចប់ការប្រកួតភ្លាម លោកគ្រូ អេ ភូថង បាននិយាយថានេះជាក្ដីស្រមៃរបស់លោកដែលចង់ឈ្នះកីឡាករថៃ ហើយថ្ងៃនេះបានជោគជ័យហើយ។ លោកចង់ឱ្យថៃបានស្គាល់គុនខ្មែរ និងចង់មកផ្សព្វផ្សាយគុនខ្មែរនៅទឹកដីថៃ។ ខណៈដែលកូនប្រុសទាំងពីរបានជោគជ័យថែមទៀត គឺរឹតតែសប្បាយចិត្តទ្វេដង៕