ទម្រង់លេងរបស់ Alexander-Arnold គឺជាចំណែកដ៏សំខាន់មួយដល់ភាពជោគជ័យរបស់ Liverpool ក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែគាត់មិនអាចបង្ហាញខ្លួនអោយក្រុមជម្រើសជាតិអង់គ្លេសបានទៀងទាត់នោះទេ។
បន្ទាប់ពីមិនបានប្រកួតជាមួយក្រុមអ៊ីតាលី អ្នកគាំទ្រមួយចំនួនរំពឹងថានឹងបានឃើញកីឡាករវ័យ ២៣ ឆ្នាំរូបនេះនាថ្ងៃច័ន្ទនៅឯកីឡដ្ឋាន Wembley ក្នុងការប្រកួតជាមួយនឹងអាល្លឺម៉ង់។
ទោះបីជាយ៉ាងណាក៏ដោយ ពួកគេបានខកចិត្តនៅពេលដែល Southgate មិនបានផ្តល់ឱកាសឱ្យគាត់លេងទាល់តែសោះ ដោយដកខ្សែការពាររូបនេះ រួមទាំង Fikayo Tomori ចេញពីបញ្ជីឈ្មោះកីឡាករទាំង ២៣ រូប។
គ្រូបង្វឹកក្រុមជម្រើសជាតិអង់គ្លេសបានជ្រើសរើសក្រុមដ៏ធំមួយសម្រាប់ការប្រកួតទាំងពីរនេះ មានន័យថាគាត់ត្រូវតែដាក់កីឡាករមួយចំនួនឱ្យនៅកៅអីបម្រុង ប៉ុន្តែយ៉ាងហោចណាស់គាត់បានពន្យល់ពីមូលហេតុដែល Alexander-Arnold គឺជាកីឡាករម្នាក់ក្នុងចំណោមនោះ។
គ្រូបង្វឹករូបនេះបានប្រាប់ Channel Four ថា “ខ្ញុំមានន័យថា យើងមានក្រុមដ៏ធំមួយ ហើយយើងមានខ្សែការពារស្តាំបួននាក់ដែលមានគុណភាពខ្ពស់”។
“នៅពេលនេះ Kieran Trippier កំពុងលេងបានយ៉ាងល្អឥតខ្ចោះ ហើយ Reece James គឺជាកីឡាករឆ្នើមម្នាក់ក្នុង Premier League នៅដើមរដូវកាលនេះ”។
“ប៉ុន្តែ ទោះបីជាយ៉ាងណា Trent គឺជាកីឡាករបាល់ទាត់ដ៏ល្អម្នាក់ផងដែរ ហើយនោះជាមូលហេតុដែលយើងជ្រើសរើសគាត់នៅក្នុងក្រុមតាំងពីដំបូង”៕
ប្រភព៖ Sportbible