លោក Fernando Santos គ្រូបង្វឹកក្រុមជម្រើសជាតិព័រទុយហ្គាល់ផ្ដែផ្ដាំទៅកូនក្រុមឱ្យផ្ដោតលើការយកឈ្នះលើក្រុមអេស្ប៉ាញតែម្ដង មិនមែនទប់ដើម្បីយកស្មើឡើងទៅវគ្គ៤ក្រុមចុងក្រោយនោះទេ។
ក្រុមព័រទុយហ្គាល់នឹងត្រូវតតាំងជាមួយក្រុមអេស្ប៉ាញនៅម៉ោង១:៤៥នាទីរំលងអាធ្រាត្រនេះហើយ សម្រាប់ការប្រកួតចុងក្រោយពានរង្វាន់ UEFA Nations League។ ការប្រកួតនេះ ក្រុមព័រទុយហ្គាល់ ទាមទារត្រឹមស្មើក៏បាន ក៏ពួកគេអាចឡើងទៅវគ្គផ្ដាច់ព្រ័ត្របានដែរ ព្រោះមាន២ពិន្ទុលើសក្រុមលេខ២អេស្ប៉ាញទៅហើយ។ តែបើតាមលោក Santos គ្រូបង្វឹកព័រទុយហ្គាល់វិញ ថាលោកចង់ឈ្នះការប្រកួតនេះតែម្ដង មិនមែនដើម្បីយកស្មើអ្វីនោះទេ។
គ្រូបង្វឹកដែលនាំព័រទុយហ្គាល់លើកពាន UEFA Nations League នៅឆ្នាំ២០១៩ដែលជាឆ្នាំបង្កើតពានដំបូងនោះបាននិយាយថា៖ “យើងផ្ដោតលើការឈ្នះការប្រកួត ជាជាងការបានឡើងទៅវគ្គបន្ដ។ ខ្ញុំចង់ឱ្យកីឡាករទាំងអស់ផ្ដោតលើការប្រកួតនេះ ដូចដែលពួកគេបានធ្វើគ្រប់គូភាគី។ ធ្វើបែបនេះនឹងធ្វើឱ្យយើងអាចឈានដល់ចំណុចដែលយើងចង់បាន”៕