អតីតកីឡាករជើងចាស់នៅក្លឹប Aston Villa លោក Gabriel Agbonlahor បានលើកឡើងថា ការចុះហត្ថលេខាយក Gabriel Jesus មកកាន់ Arsenal ជារឿងដ៏គួរឲ្យចាប់អារម្មណ៍ ជាជាងការនាំយក Erling Haaland របស់ក្លឹប Manchester City។
Jesus មកដល់ទឹកដី Emirate ជាមួយតម្លៃផ្ទេរ ៤៥ លានផោន ក៏ប្រហែលនឹង Haaland ដែលក្រុមលោក Pep Guardiola ចាយ ៥១ លានផោន នាំចេញពីក្លឹបអាល្លឺម៉ង់ Borussia Dortmund។ សព្វថ្ងៃ Arsenal ឈរលេខ ១ នៅកំពូលតារាង នាំមុខ ១ ពិន្ទុទៅលើ Spurs និង City តែ Haaland ជា Top Scorer រកបាន ១១ គ្រាប់ក្នុងលីគ។
យ៉ាងណាងាកទៅ Agbonlahor បាននិយាយប្រាប់ talkSPORT បែបនេះ៖ “ការចុះហត្ថលេខាដ៏ល្អបំផុតនៅរដូវក្តៅ សម្រាប់ខ្ញុំគឺ Gabriel Jesus [ទៅ Arsenal] ខណៈដែល Haaland ខ្ញុំយល់ថាស្ថិតិរបស់គេលេចធ្លោ តែ City តែងតែធ្វើបានល្អស្រាប់ហើយតាំងពីដើមមក ទោះអត់ Haaland ក៏ដោយ ជាការពិតគ្រាប់បាល់ល្អៗក៏កើតមានដែរ ទោះអត់វត្តមានរបស់គេ”។
លោកសង្កត់ធ្ងន់៖ “តែខុសពី Gabriel Jesus គេហាក់ផ្លាស់ប្តូរ Arsenal ឲ្យទៅកម្រិតមួយផ្សេងទៀត ដែលនេះជាខ្សែប្រយុទ្ធថ្មី មិនខ្លាចរអានឹងប្រព័ន្ធការពារក្រុមណាមួយឡើយ”។ ទៅមើលស្ថិតិបង្ហាញខ្លួនរបស់កីឡាករប្រេស៊ីលបន្តិច ៨ ប្រកួត ក៏រកបាន ៤ គ្រាប់និង Assist ៣ លើកឲ្យក្រុមលោក Mikel Arteta៕
ប្រភព៖ talkSPORT