ជួនពេលដែលអេស្ប៉ាញរបូតចាញ់ស្វីស ១-២ ក៏នាំឲ្យព័រទុយហ្គាល់កាន់តែមានទឹកមាត់លេប ខណៈនេះក្រុមដឹកនាំដោយលោក Fernando Santos ឈរលេខ ១ ក្នុង Group 2 មាន ១០ ពិន្ទុ នាំមុខលើក្រុមលោក Luis Enrique ដែលមាន ៨ ពិន្ទុ។ នៅសល់ការប្រកួតមួយជុំទៀតប៉ុណ្ណោះ ដើម្បីសម្រេចយកក្រុមឡើងទៅវគ្គបន្ត និងមួយក្រុមធ្លាក់ទៅកាន់ League B។
ជាលទ្ធផលជុំចុងក្រោយ គឺព័រទុយហ្គាល់ ត្រូវប៉ះអេស្ប៉ាញ ខណៈស្វីស ត្រូវប៉ះសាធារណរដ្ឋឆេក។ សម្រាប់ជំនួបគូធំ គឺព័រទុយហ្គាល់បើចង់ឡើងត្រូវតែស្មើយ៉ាងតូច ឬឈ្នះ យក ៣ ពិន្ទុពេញ ដើម្បីឡើងទៅវគ្គបន្ត ខណៈគូតូច បើស្វីសស្មើ គឺបន្តនៅ League A រដូវកាលបន្ទាប់ តែបើស្វីសចាញ់ នឹងត្រូវធ្លាក់ទៅ League B។
ងាកទៅ Diogo Dalot សមាជិកក្លឹប Man Utd ក៏ជាចំណែករកគ្រាប់បាល់ឲ្យជម្រើសជាតិទល់ឆែក ៤-០ កាលពីយប់មិញផងដែរ។ និយាយក្រោយចប់ការប្រកួត គេបានបង្ហាញមហិច្ឆតាក្នុងការយកឈ្នះទៅលើអេស្ប៉ាញ ដើម្បីបានកៅអីឡើងទៅវគ្គ ៤ ក្រុម Nations League។
ខ្សែការពារខាងលើនិយាយ៖ “ការគិតរបស់ពួកយើង គឺនៅតែដដែល ទោះកន្លងមកអេស្ប៉ាញបានឈ្នះជាបន្តបន្ទាប់ ឬលទ្ធផលពួកយើងមិនកើតដូចការចង់បាន ក៏ប្រកួតនៅទីក្រុង Braga [ជុំទី ៦] យើងនឹងទៅលេងយក ៣ ពិន្ទុឲ្យទាល់តែបាន វានឹងក្លាយជាប្រកួតដ៏តានតឹងមួយ តែយើងនឹងធ្វើគ្រប់យ៉ាង ដើម្បីឆ្លងទៅវគ្គបន្ទាប់”៕
ប្រភព៖ BeSoccer
