លោក Arsene Wenger បាននិយាយថាក្រុមកាំភ្លើងធំ Arsenal នៅឆ្នាំនេះ នឹងមានឱកាសល្អក្នុងការឈ្នះពានរង្វាន់ English Premier League ហើយ។
ក្រុមកាំភ្លើងធំ Arsenal នៅពេលនេះកំពុងឈរនៅកំពូលតារាង Premier League ហើយ ដោយឈ្នះ៦ប្រកួតក្នុងចំណោម៧ប្រកួតនាដើមរដូវកាលនេះ។ ជាមួយការនៅលើគេ និងបានបង្ហាញទម្រង់លេងយ៉ាងល្អផងនោះ ទើបបានជាមានលោក Wenger ម្នាក់ជឿជាក់ថាក្រុម Arsenal នារដូវកាលនេះនឹងធ្វើបានល្អ ហើយអាចឈ្នះពានរង្វាន់លីគកំពូលអង់គ្លេស Premier League បានមិនខាន។
អតីតអ្នកចាត់ការរបស់ Arsenal ដែលធ្លាប់ដឹកនាំក្រុមឈ្នះពានមាសលេងមិនដែលចាញ់សោះនោះ បាននិយាយថា៖ “ខ្ញុំអាចនិយាយថា Arsenal មានឱកាសល្អនៅរដូវកាលនេះ ព្រោះខ្ញុំមិនបានមើលឃើញក្រុមដទៃទៀតដែលលើសពួកគេនោះទេ។ ខ្ញុំជឿថាវាជាឱកាសល្អហើយដើម្បីបង្កើតកំណត់ត្រាថ្មីនៅរដូវកាលនេះ”៕