ខ្សែប្រយុទ្ធ Eden Hazard បាននិយាយថាខ្លួនចង់លេងឱ្យបានច្រើននៅក្រុម Real Madrid នារដូវកាលនេះ ដើម្បីឱ្យខ្លួនអាចលេងនៅពានរង្វាន់ FIFA World Cup 2022 នៅចុងឆ្នាំឱ្យបានល្អ។
Hazard នៅតែទទួលបានឱកាសជាប់ជម្រើសជាតិបែលហ្សិកដដែល បើទោះជារូបគេមិនសូវបានលេងនៅក្រុម Real Madrid ក៏ដោយ។ ជាមួយគ្នានេះដែរ បើតាមការអះអាងរបស់សាមីខ្លួនគឺរូបគេមិនមានបញ្ហារបួសអ្វីទៀតនោះទេ ដោយការមិនបានលេងច្រើននៅក្រុមអធិរាជសគឺជាការសម្រេចចិត្តផ្ទាល់របស់អ្នកចាត់ការ Carlo Acelotti ផ្ទាល់។ នៅក្រុម Real Madrid មានកីឡាករល្អច្រើននៅតំបន់ប្រយុទ្ធដែលធ្វើឱ្យមានការប្រកួតប្រជែងដើម្បីបានជម្រើសដំបូង។
អតីតកីឡាករឆ្នើមបំផុតម្នាក់របស់ក្រុម Chelsea បាននិយាយថា៖ “ខ្ញុំមានអារម្មណ៍ល្អនៅ Real Madrid ដោយគ្រាន់តែខ្ញុំបានលេងតិចប៉ុណ្ណោះ។ ខ្ញុំចង់លេង លេងឱ្យបានច្រើន។ ខ្ញុំដឹងថាខ្ញុំអាចលេងបានល្អឡើងវិញហើយ។ ខ្ញុំសង្ឃឹមថាខ្ញុំនឹងអាចលេងបានពេញកម្លាំងពីពេលនេះទៅ ដើម្បីលេង World Cup នៅចុងឆ្នាំ”៕