ខ្សែបម្រើ Jude Bellingham មានភាគរយច្រើននឹងសម្រេចការផ្ទេរដ៏ភ្ញាក់ផ្អើលមួយ នៅទីផ្សារដោះដូរខាងមុខ តែទំនងនារដូវក្តៅ ច្រើនជាងរដូវរងា ដើមឆ្នាំ ២០២៣។ ខាងក្លឹបអាណាព្យាបាល Borussia Dortmund ក៏បានដាក់តម្លៃមកហើយដែរ គឺ ១៥០ លានអឺរ៉ូ ជាកំហិត ទើបព្រមអនុញ្ញាតឲ្យកីឡាករអង់គ្លេសចាកចេញទៅ។
យុវជនវ័យ ១៩ ឆ្នាំក៏ត្រូវបានគេដឹង មានក្លឹបធំៗជាច្រើនតាមឃ្លាំមើល តួយ៉ាងគឺ Liverpool, Chelsea, Man Utd, Man City និងក្លឹបដទៃទៀតនៅលីគកំពូលអឺរ៉ុប។ ទោះជាយ៉ាងណា Bellingham ហាក់ដាក់បេះដូងទៅក្លឹបនៅអេស្ប៉ាញ ច្រើនជាងក្លឹបនៅអង់គ្លេស នោះគឺ Real Madrid ជាទ្រនំបន្ទាប់ ដែលគេចង់ទៅចូលរួម។
តាមការចុះផ្សាយរបស់អ្នកកាសែតលោក Jose Alvarez Haya បានឲ្យដឹងថា Bellingham ចង់ទៅចូលរួមនៅអធិរាជស ចង់ក្លាយជាផ្នែកមួយក្នុងការផ្លាស់ប្តូរតំបន់បម្រើថ្មី ដែលជើងចាស់ដូចជា Casemiro, Luka Modric និង Toni Kroos បានបែកបាក់អស់ទៅហើយនោះ។
យើងមានតែរង់ចាំមើល ដ្បិតអី Madrid ក៏ជាក្លឹបមិនរអានឹងការចាយវាយដែរ បើពួកគេត្រូវចិត្តលើកីឡាករណាពិតប្រាកដ។ រំឭកថា Bellingham ដែលជាអតីតសមាជិកនៅក្លឹបអង់គ្លេស Birmingham City កាលឆ្នាំ ២០២០ ផ្លាស់មក Dortmund ហើយបង្ហាញខ្លួន ១០០ ប្រកួត រកបាន ១៣ គ្រាប់និង Assist ១៨ លើកផងដែរ៕
ប្រភព៖ Sportsmole