កីឡាកររបស់ក្លឹប Tottenham Hotspur គឺខ្សែការពារ Ericc Dier ត្រូវបានគេរាយការណ៍ថា កំពុងមានទំនាក់ទំនងស្នេហ៍ជាមួយតារាម៉ូដែលសាច់សខ្ចី Anna Modler ដែលអតីតកាលនារីម្នាក់នេះ ធ្លាប់ជាសង្សារចាស់របស់កីឡាករឈីលី Alexis Sanchez។
តារាឆ្នើមក្លឹបមាន់ខ្នាយមាស រមែងទទួលបានការលើកទឹកចិត្តជារឿយៗ ពីតារាស្រីវ័យ ២៤ ឆ្នាំ ដែលនាងតែងតែទៅចូលរួមទស្សនាការប្រកួតរបស់ក្លឹប Spurs នៅឯកីឡដ្ឋានក្នុងទីក្រុងឡុង។ ជាក់ស្តែងដូចប្រកួតយកឈ្នះ ៦-២ ថ្ងៃមុន ក៏មានវត្តមាន Anna ផងដែរ ហើយថែមទាំងថតរូបខ្លួន ជាមួយមិត្តភក្តិដោយបង្ហោះសារថា ពួកនាងគឺជាកម្លាំងចិត្តសម្រាប់ Eric និងក្រុមទាំងមូល ឆ្លងកាត់ការប្រកួតដោយមិនទាន់ស្គាល់ពាក្យថា ចាញ់ រដូវកាលនេះ។
នេះអាចជាកម្លាំងចិត្តពិតៗ ដែលនាំឲ្យខ្សែការពារវ័យ ២៩ ឆ្នាំ បង្ហាញទម្រង់លេងយ៉ាងល្អឲ្យក្រុមលោក Antoino Conte ដោយរកបាន ២ គ្រាប់ នៅ ៩ ប្រកួតរដូវកាលថ្មី ហើយសូម្បីជម្រើសជាតិអង់គ្លេស ក៏ទទួលបានការកោះហៅដោយមិនស្ទាក់ស្ទើរពីលោក Gareth Southgate ផងដែរ។
រំឭកបន្តិច Anna និង Sanchez ឯណោះ តាមដំណឹងធ្លាប់ទាក់ទងគ្នាកាលពីឆ្នាំ ២០២០ ហើយក៏បែកបាក់គ្នាទៅវិញ។ នោះគឺកំឡុងពេលខ្សែប្រយុទ្ធឈីលី ឈរជើងនៅតំណែងប្រយុទ្ធ គ្រោងអាវលេខ ៧ ឲ្យក្លឹបអ៊ីតាលី Inter Milan។ ឥឡូវយើងចាំមើលចំណងស្នេហ៍ថ្មី រវាង Dier តើនឹងអាចធានាពីភាពយូរអង្វែងបានដល់កម្រិតណា?
ប្រភព៖ បរទេស