ថ្ងៃនេះមានរឿងក្តៅគគុក ពាក់ព័ន្ធចចាមអារ៉ាមកីឡាករគោលដៅដែល Liverpool ចង់បានជាយូរណាស់មកហើយ ដល់ឥឡូវត្រូវបានក្លឹបអាណាព្យាបាលរំអុកឡើងថ្លៃកប់ពពក។ នោះគឺ Jude Bellingham កីឡាករស្ថិតក្រោមការគ្រប់គ្រងរបស់ក្លឹប Borussia Dortmund ជាប់កុងត្រាដល់ចុងខែមិថុនា ឆ្នាំ ២០២៥ តែក្នុងកិច្ចព្រមព្រៀង ពុំមានកំណត់តម្លៃផ្តាច់កុងត្រា ឬ Release Clause ដូច Erling Haaland ឡើយ។
យុវជនលេងតំណែងបម្រើ វ័យ ១៩ ឆ្នាំ ពេលចុងក្រោយកំពុងក្លាយជាគ្រាប់ពេជ្រមិនអាចខ្វះបានរបស់ក្លឹបអាល្លឺម៉ង់ ហើយក៏ត្រៀមនឹងចារកំណត់ត្រា ក្នុងនាមជាកីឡាករអង់គ្លេសថ្លៃបំផុតផងដែរ ប្រសិនជាការផ្ទេរ ឈានដល់លទ្ធផលសម្រេចរវាងភាគីក្លឹបចង់បានណាមួយ។
តាមរបាយការណ៍ពី The Athletic ចុះផ្សាយថា Dortmund បានដាក់តម្លៃខ្លួន Bellingham មកហើយ ពោលគឺ ១៣១ លានផោន ឬប្រហែល ១៥០ លានអឺរ៉ូ ទើបព្រមលក់គេចេញ តែនេះមិនមែនបើកផ្លូវសម្រាប់ខែមករាទេ ផ្ទុយទៅវិញ ជាតម្លៃរង់ចាំដល់រដូវក្តៅ ឬបញ្ចប់រដូវកាល ឆ្នាំ ២០២៣ ឯណោះ។ ជាការពិតបើតម្លៃ ១៣១ លានផោន អាចសម្រេចទៅបាន នោះនឹងបំបែកកំណត់ត្រាចាស់ នៃការផ្ទេរ Jack Grealish ពី Aston Villa ទៅកាន់ក្លឹប Man City កាលពីឆ្នាំ ២០២១ នៅតម្លៃ ១០០ លានផោន។
យ៉ាងណាពាក់ព័ន្ធនឹងការចង់បានខ្សែបម្រើខាងលើ តាមពិតទៅ Liverpool បានដាក់គោលដៅតាំងពី ១០ ឆ្នាំមុនមកម្ល៉េះ នោះគឺគ្រា Bellingham មានអាយុ ៩ ឆ្នាំ កំពុងហ្វឹកហាត់នៅថ្នាល U11 របស់ក្លឹប Birmingham។
ខណៈពេលនោះ កីឡាករបានឆ្លងកាត់ការតេស្តរយៈពេល ២ ថ្ងៃ ជាមួយក្លឹបមានមូលដ្ឋានក្នុងទីក្រុង Merseyside ហើយហង្សក៏បាក់ចិត្ត ចាប់អារម្មណ៍ទៅលើទេពកោសល្យរបស់គេផង និងបានប្រញាប់ទាក់ទងភ្លាមៗទៅកាន់ក្លឹប Birmingham ថានឹងយល់ព្រមទូទាត់ប្រាក់ ៩ ០០០ ផោន ដើម្បីចុះហត្ថលេខាយកក្មេងប្រុសខាងលើមកចូលរួម។ ខាងក្លឹបយល់ព្រម តែដល់ចម្លើយ ទទួលបានពីក្រុមគ្រួសារ គឺបដិសេធ ដោយខាងឪពុកម្តាយកីឡាករមិនយល់ព្រមឡើយ ហើយបន្តឲ្យ Bellingham នៅហ្វឹកហាត់ជាមួយក្លឹបបច្ចុប្បន្នដដែល។
រហូតដល់ឆ្នាំ ២០១៩ ពេលកីឡាករខាងលើ ឡើងមកលេងនៅឈុតធំឲ្យក្លឹប Birmingham ក៏មានក្លឹប ២ ឯទៀត ដូចជា Man City និង Chelsea បានពេញចិត្តលើគុណភាពរបស់គេដូចគ្នា ហើយដាក់សំណើចង់នាំយក តែមិនទទួលបានសម្រេច។ ដល់តែចុងក្រោយ បែរជាត្រូវបានក្លឹប Dortmund ឯណោះ ជាអ្នកអាចអូសទាញចិត្តគ្រាប់ពេជ្រជំនាញជើងស្តាំ ឲ្យទៅចូលរួម ជាមួយតម្លៃជាង ២០ លានផោន កាលពី ២ ឆ្នាំមុន។
នេះចាយពេលដុសខាត់ អភិវឌ្ឍគុណភាព Bellingham ត្រឹមពេល ២ ឆ្នាំ ឥឡូវបានដាក់តម្លៃលើស ១ ទ្វេជា ៦ ដល់ទៅ ១៣១ លានផោន ហើយសម្រាប់ Liverpool កាន់តែសោកស្តាយខ្លាំង ព្រោះនៅឆ្នាំ ២០១២ ដែលពួកគេព្យាយាមដែរ តែយកមិនបាននៅតម្លៃទាបជាងបច្ចុប្បន្ន ដល់លើស ១០០ ដង៕
ប្រភព៖ បរទេស