ខ្សែប្រយុទ្ធ Marco Asensio មិនអាចឆ្លើយសំនួរ ផ្ទេរទៅលេងនៅ Barcelona នៅរដូវកាលក្រោយបានទេ បន្ទាប់ពីមានដំណឹងថាក្រុមរបស់លោក Xavi ចាប់អារម្មណ៍ចង់បានខ្លួន។
បន្ទាប់ពីឈានដល់ឆ្នាំចុងក្រោយនៃកុងត្រារបស់ខ្លួន Asensio ត្រូវបានក្រុម FC Barcelona ចាប់អារម្មណ៍ភ្លែតតែម្ដង។ បើតាមការចុះផ្សាយនានា ក្លឹបអ្នកមានបុណ្យគ្រងទិញយករូបគេតែម្ដងមុនផុតកុងត្រា ប្រសិនបើខ្សែប្រយុទ្ធអេស្ប៉ាញនេះចង់មកចូលរួមជាមួយខ្លួននៅត្រឹមខែមករាដើមឆ្នាំ២០២៣ខាងមុខ។ តែអ្វីដែលសំខាន់មួយទៀតចំពោះការផ្ទេរនេះ គឺ Asensio ជាកីឡាករ Real Madrid និងចេញពីថ្នាលផង ដូច្នេះហើយអាចនឹងពិបាកបន្ដិចក្នុងការទៅលេងនៅ Camp Nou មិនខាន។
ចំពោះរឿងនេះដែរ Asensio បាននិយាយដែរថា៖ “លេងឱ្យ Barcelona? ខ្ញុំមិនអាចឱ្យចម្លើយអ្នកនៅពេលនេះទេ។ ខ្ញុំមិនដឹងថាពួកគេចង់បានខ្ញុំ ដូច្នេះខ្ញុំមិនទាន់គិតរឿងនេះឡើយ។ មានរឿងចចាមអារ៉ាមជាច្រើនចំពោះការដោះដូរ ហើយវាជារឿងធម្មតានោះទេ។ ខ្ញុំនៅសល់ពេល៧ខែទៀត ខ្ញុំអាចចុះកុងត្រាជាមួយនរណាក៏បាន”៕