ក្រុមហ៊ុនសម្ព័ន្ធ City Football Group កំពុងទាក់ទងទិញក្លឹបបាល់ទាត់មួយទៀតនៅប្រេស៊ីលឈ្មោះថា Bahia លេងនៅលីគលំដាប់ទី២ ដើម្បីចូលជាក្លឹបទី១២របស់ពួកគេ។
ក្រុមហ៊ុនខាងលើនេះដែរ គឺមានម្ចាស់ជាសេដ្ឋីនៅអារ៉ាប់ឈ្មោះថា Mansour bin Zayed bin Sultan Al Nahyan។ ក្លឹប Manchester City ក៏ស្ថិតនៅក្រោមហ៊ុន City Football Group ផងដែរ ទើបមានឱកាសបានជោគជ័យដូចរាល់ថ្ងៃ ដោយសារតែពួកគេមានប្រាក់គ្រប់គ្រាន់សម្រាប់ចាយវាយទិញកីឡាករ។ ដើម្បីពង្រឹងមហិច្ឆតារបស់ខ្លួនបន្ថែមទៀត ក្រុមហ៊ុនខាងលើក៏កំពុងពង្រីកទៅតំបន់អាមេរិកខាងត្បូងផងដែរ។
ជាក់ស្ដែងមានដំណឹងថាពួកគេកំពុងចរចាទិញក្លឹប Bahia ហើយដែលលេងនៅលីគលំដាប់ទី២នៅប្រេស៊ីល។ ប្រសិនបើទិញបានមែន នោះ Bahia ជាក្លឹបទី១២ស្ថិតក្រោមការគ្រប់គ្រងរបស់ City Football Group ។ បើគិតតែនៅតំបន់អាមេរិកឡាទីនវិញ ពួកគេនឹងក្លាយជាក្លឹបទី៣ផងដែរ៕