ខ្សែប្រយុទ្ធ Ousmane Dembele បាននិយាយថាពីឆ្នាំ២០១៧ដល់២០២១ ជារយៈពេល៥ឆ្នាំដែលខ្លួនមិនបានធ្វើអ្វីសោះ ក្រៅពីមានបញ្ហារបួសជាប់ជានិច្ច។
ខ្សែប្រយុទ្ធស្លាបសញ្ជាតិបារាំងបានមកដល់ទឹកដី Camp Nou នៅឆ្ណាំ២០១៧ ដោយកាលនោះផ្ទេរពីក្រុម Dortmund មកជាមួយតម្លៃខ្លួនខ្ពស់ ហើយត្រូវបានអ្នកគាំទ្ររំពឹងថានឹងអាចជំនួស Neymar បាន។ តែចុងក្រោយ Dembele មិនបានធ្វើឱ្យអ្នកគាំទ្រសប្បាយចិត្តនោះទេ ពោលគឺទម្រង់លេងមិនល្អ ហើយមានបញ្ហារបួសជាប់ជានិច្ច មិនសូវបានលេងទៀងទាត់ឡើយ។
តែមកដល់រដូវកាលថ្មីនេះវិញ លោក Xavi បានផ្ដល់ទំនុកចិត្តដល់គេច្រើន រហូតបានលេងក្នុងប្រកួតសំខាន់ៗ និងទម្រង់លេងល្អប្រសើរផងដែរ។ Dembele បានបង្ហាញចំណាប់អារម្មណ៍ថា៖ “ពីឆ្នាំ២០១៧ដល់ ២០២១ ខ្ញុំបានចំណាយឥតប្រយោជន៍ច្រើនណាស់។ ខ្ញុំបានបាត់បង់៥ឆ្នាំក្នុងជីវិត ដោយមិនបានធ្វើអ្វីសោះ។ ខ្ញុំមានរបួសច្រើន តែខ្ញុំក៏បានខិតខំប្រឹប្រឹងឡើងវិញដើម្បីយកឈ្នះវា។ ខ្ញុំសង្ឃឹមថាពីពេលនេះទៅ ខ្ញុំអាចធ្វើអ្វីដែលខ្ញុំចង់បាន”៕