ការដោះដូរកីឡាករនៅតំបន់អឺរ៉ុប នឹងវិលចូលមកដល់សារជាថ្មី នៅខែមករា ឆ្នាំ ២០២៣ ដែលគេហៅថា ទីផ្សាររដូវរងា ហើយពេលវេលានោះ តម្រុយនៃការបន្តកុងត្រាថ្មី ឬការចាកចេញក៏អាចនឹងលេចឡើងជាបណ្តើរៗ។
កីឡាករដែលត្រៀមផុតកុងត្រានៅបញ្ចប់រដូវកាល ហើយគ្រោងចាកចេញ ក៏មានសិទ្ធអាចព្រមព្រៀងជាលក្ខណៈ Pre-Contract ជាមួយក្លឹបដទៃទុកជាមុន តែកីឡាករខ្លះទៀត បើច្បាស់លាស់អំពីអនាគតជាមួយក្លឹបអាណាព្យាបាល នោះក៏នឹងក្លាយជាពេលស៊ីញ៉េកុងត្រាថ្មីដ៏សក្ដិសម។ ខាងក្រោម CTS SPORT និយាយអំពីតារាឆ្នើមវ័យចំណាស់ ៦ រូប ដែលត្រូវអស់សុពលភាពកុងត្រាត្រឹមថ្ងៃទី ៣០ មិថុនា ឆ្នាំ ២០២៣ ឬចុងបញ្ចប់រដូវកាលនេះ៖
៦) Jorginho
ខ្សែបម្រើវ័យ ៣០ ឆ្នាំ នៅបន្តជាចំណែកធំមួយរបស់ Chelsea តែយ៉ាងណាពាក់ព័ន្ធការបន្តកុងត្រាថ្មី ឲ្យលើសពីបញ្ចប់រដូវកាលនេះ ហាក់មានភាគរយទាបណាស់។ ជាក់ស្តែងភ្នាក់ងាររត់ការរបស់កីឡាករផ្ទាល់កន្លងមក ក៏លើកឡើងជារឿយៗ ថា Jorginho ទំនងជ្រើសការវិលទៅក្លឹបនៅប្រទេសកំណើតអ៊ីតាលី អាចមួយក្នុងចំណោមក្លឹប AC Milan, Inter Milan, Juventus, Roma ឬ Napoli។
៥) Ilkay Gundogan
មិនខុសពី Jorginho បើងាកមកមើលខ្សែបម្រើសញ្ជាតិអាល្លឺម៉ង់ឯណេះវិញ ក៏បន្តជាចំណែកធំមួយ ក្រោមការដឹកនាំរបស់លោក Pep Guardiola នៅក្លឹប Manchester City។ ប៉ុន្តែពេលវេលាឈរជើងនៅមេឃខៀវ អាចនឹងឈានមកដល់ផ្លូវបំបែក នៅឆ្នាំទី ៧ ខាងមុខ។
បង្ហើបកាលពីខែមេសា Gundogan ថា ទ្រនំបន្ទាប់ ២ ខ្លួនអាចទៅចូលរួម គឺក្លឹបនៅប្រទេសទួរគី ឬក៏ក្លឹបណាមួយនៅឯទឹកដីសហរដ្ឋអាមេរិក។
៤) Karim Benzema
កំពុងល្អសុខៗបែរជារបួស ដែលផ្តល់ឱកាសឲ្យលោក Carlo Ancelotti អាចតេស្តប្រព័ន្ធថ្មី ជាមួយការប្រើ Federico Valverde, Vinicius Jr និង Rodrygo ហើយលទ្ធផលឃើញថា ការលេងរបស់ Real Madrid នៅតែល្អ។
ហេតុនេះ នាំឲ្យគេជឿជាក់ វត្តមានកីឡាករបារាំងអាចមិនជាសំខាន់ដល់ថ្នាក់ខ្វះមិនបានឡើយ ហើយការផុតកុងត្រាថ្មី នៅចុងខែមិថុនា ឆ្នាំ ២០២៣ ក៏អាចជាពេលចាកចេញ ប៉ុន្តែបើសួរថា ក្លឹបណាជាទ្រនំបន្ទាប់ យើងក៏មិនទាន់អាចបង្ហើបបានដែរនៅពេលនេះ។
៣) N’Golo Kante
ដោយសារតែរបួសញាំញី ក៏នាំឲ្យ Kante សឹងតែបាត់មុខពីទីលានឲ្យ Chelsea ហើយជួនពេលកុងត្រាកៀកនឹងបញ្ចប់ផង ក៏មានការជឿជាក់ពីសំណាក់អ្នកគាំទ្រជាច្រើន ថាខ្សែបម្រើការពារសញ្ជាតិបារាំង ពិតណាស់នឹងចាកចេញ ក្នុងលក្ខខណ្ឌផ្ទេរឥតតម្លៃខ្លួន នៅពេលខាងមុខ។ តែយ៉ាងណាបើតាមចចាមអារ៉ាមក៏ល្ហិចល្ហៀង អាចជាក្លឹប Paris Saint-Germain ត្រៀមត្រងយក ដោយសាកល្បងចរចានៅខែមករា ឬស៊ូរង់ចាំដល់ចុងខែមិថុនា។
២) Lionel Messi
តារាឆ្នើមអាហ្សង់ទីនកំពុងរីករាយនឹងការលេងឲ្យ PSG ដោយមិនថាការរកគ្រាប់បាល់ និងការ Assist គឺធ្វើបានល្អជាបន្តបន្ទាប់ នៅរដូវកាលថ្មី ២០២២/២៣។ ជាពិសេសការសហការយ៉ាងល្អ រវាងដៃគូចាស់ Neymar Jr នៅតំបន់ខាងលើ ក៏ប៉ុន្តែងាកមកកុងត្រាឲ្យក្លឹបសេដ្ឋីបារាំង គឺសល់ពេលត្រឹម ៩ ខែទៀតប៉ុណ្ណោះ។
ក្នុងកិច្ចព្រមព្រៀងក៏ Messi មានសិទ្ធអាចពិចារណាការបន្តកុងត្រាថ្មី ១ ឆ្នាំបន្ថែម តែបើកីឡាករគិតចង់ចាកចេញ ក៏ក្លឹបពិបាកនឹងហាមឃាត់ដែរ ហើយទ្រនំបន្ទាប់ អាចជាវិលទៅក្លឹបចាស់ Barcelona។
១) Cristiano Ronaldo
កុងត្រារបស់ Ronaldo នៅ Man Utd ក៏មិនខុសពី Messi នៅ PSG ពោលកីឡាករសុទ្ធមានសិទ្ធអាចជ្រើសយកការបន្តថ្មី រយៈពេល ១២ ខែ។ តែបើងាកទៅមើលស្ថានភាពលើទីលាន ឱកាសរបស់បុរសវ័យ ៣៧ ឆ្នាំ ហាក់មានការខ្សត់ចុះ និងត្រូវបានលោក Erik ten Hag ដាក់ឲ្យអង្គុយបម្រុងច្រើនជាងជាប់ជម្រើសដំបូង។
ដូច្នេះក៏មិនច្បាស់ដែរថា Ronaldo នឹងសម្រេចចិត្តបែបម៉េច? ចុះសម្រាប់មតិគ្នាយើងវិញ ពាក់ព័ន្ធអនាគតកីឡាករទាំង ៦ រូប តើពួកគេគួរបន្តនៅ ឬជ្រេរកក្លឹបថ្មីណាមួយ ដែលសក្តិសម?
ប្រភព៖ បរទេស