Arda Turan ដែលកំពុងលេងឱ្យក្លឹប Basaksehir ក្រោមលក្ខខណ្ឌខ្ចីជើង២រដូវកាលកន្លះពីក្លឹប Barcelona នោះ ត្រូវរងពិន័យ១៦ប្រកួត ដោយសារតែរូបគេបានរុញជំនួយការអាជ្ញាកណ្ដាល។
Turan ដែលជាកីឡាករបង្ហាញខ្លួនឱ្យប្រទេសទួរគីបាន១០០ប្រកួតមកហើយនោះ ត្រូវអាជ្ញាកណ្ដាលបណ្ដេញចេញពីទីលាន ដោយសារតែរូបគេបានរុញជំនួយការអាជ្ញាកណ្ដាល ក្នុងការប្រកួត Super Lig ជាមួយក្រុម Sivaspor ។ ក្រោយពីចប់ការប្រកួតដែលស្មើគ្នា ១-១ នោះទៅ សហព័ន្ធទួរគីបានចេញសេចក្ដីប្រកាសថានឹងពិន័យកីឡាករខាងលើនេះ ១៦ប្រកួត អមជាមួយទឹកប្រាក់ជិត៧ពាន់ផោនថែមទៀត។
១៦ប្រកួតនោះ គឺពិន័យចំពោះការរុញអាជ្ញាកណ្ដាល១០ប្រកួត ការប្រមាថអាជ្ញាកណ្ដាល៣ប្រកួត និងការគំរាមកំហែង៣ប្រកួតទៀត។ ក្រោយពីស្មើនេះ ក្រុម Basaksehir កំពុងប្រជែងយកពានលីគកំពូលរបស់ទួរគី ដោយចាញ់ពិន្ទុក្រុមកំពូលតារាង Galatasaray ៣ពិន្ទុ ។ ស្របពេលដែលលីគនៅសល់២ប្រកួតទៀតប៉ុណ្ណោះ៕
ប្រភព៖ BBC
