Musiala វ័យ ១៩ ឆ្នាំបានបង្ហាញខ្លួនជាលើកដំបូងនៅ Bayern Munich ក្នុងឆ្នាំ ២០២០ ចាប់តាំងពីពេលនោះមកគាត់បានក្លាយខ្លួនជាកីឡាករដ៏សំខាន់បំផុតសម្រាប់ក្លឹបយក្សអាឡឺម៉ង់មួយនេះ។
ទោះជាយ៉ាងណាក៏ដោយ មុនពេលដែលគាត់ចូលលេងអោយជម្រើសជាតិអាល្លឺម៉ង់ Musiala ធ្លាប់បានលេងតំណាងឱ្យប្រទេសអង់គ្លេសនៅកម្រិត U15, U16, U17 និង U21 ផងដែរ។ គាត់គឺជាផ្នែកមួយនៃសាលាបណ្តុះបណ្តាលរបស់ Chelsea និង Southampton មុនពេលម្ចាស់ជើងឯក Bundesliga របស់អាឡឺម៉ង់នាំយកគាត់នៅឆ្នាំ ២០១៩។
អតីតកីឡាករជម្រើសជាតិអាល្លឺម៉ង់ Matthaus ជឿជាក់ថា អង់គ្លេសបានធ្វើកំហុសដ៏ធំមួយក្នុងការអនុញ្ញាតឱ្យ Musiala ទៅលេងឱ្យជម្រើសជាតិអាល្លឺម៉ង់។
គាត់បានប្រាប់កាសែត Daily Mail ថា៖ អ្នកបានផ្តល់ឱ្យកីឡាករល្អបំផុតវ័យក្មេងរបស់អង់គ្លេសទៅប្រទេសអាឡឺម៉ង់ – Musiala។ ខ្ញុំមានកូនប្រុសម្នាក់អាយុ ៨ ឆ្នាំ។ ខ្ញុំត្រូវទិញអាវ Bayern Munich ដែលមានលេខ ៤២ នៅខាងក្រោយ និងអាវអាល្លឺម៉ង់លេខ ១៤។ កូនប្រុសរបស់ខ្ញុំឈ្លក់វង្វេងនឹង Musiala ណាស់។ ដូច្នេះសូមអរគុណប្រទេសអង់គ្លេសដែលបានផ្តល់ឱ្យគាត់មកពួកយើង!
ខ្ញុំមិនដឹងថាហេតុអ្វីបានជាអ្នកមិនប្រឹងប្រែងបន្ថែមទៀតដើម្បីរក្សាកីឡាកររូបនេះក្នុងជម្រើសជាតិអង់គ្លេសនោះទេ។ យើងសប្បាយចិត្តណាស់ដែលមានគាត់។
អតីតខ្សែបម្រើ Bayern រូបនេះបានប្រៀបធៀប Musiala ទៅនឹងម្ចាស់ពានរង្វាន់ Ballon d’Or ប្រាំពីរសម័យកាលគឺ Lionel Messi ផងដែរ។
គាត់បានបន្ថែមថា៖ ពេលគាត់នៅលើទីលាន នេះគឺដូច Messi កាលពីបីឆ្នាំមុន។ គាត់មានអ្វីគ្រប់យ៉ាង។ លឿន អូសញាក់បានល្អ ការបញ្ជូនបាល់ ហើយគេអាចស៊ុតបញ្ចូលទីបានទៀតផង៕
ប្រភព៖ sportbible