ខ្សែការពារកណ្តាលដ៏ល្អរបស់ Nice កីឡាករ Jean-Clair Todibo ត្រូវបានបណ្តេញចេញយ៉ាងភ្ញាក់ផ្អើល ក្រោយពីអាជ្ញាកណ្តាលផ្លុំកញ្ចែរចាប់ផ្តើមការប្រកួតបានត្រឹមតែ ៩ វិនាទីប៉ុណ្ណោះ។
ហេតុការនេះបានកើតឡើងនៅលីគកំពូលបារាំង Ligue 1 ក្នុងជំនួបដណ្តើមពិន្ទុប្រចាំសប្តាហ៍រវាងក្លឹប Nice ជាមួយនឹង Angers។
Nice បានធ្វើជាម្ចាស់ផ្ទះទទួលក្រុម Angers ក្នុងការប្រកួតបើកឆាកនៅម៉ោង ២ រសៀលនៅ Allianz Riviera ប៉ុន្តែបានធ្វើឱ្យការចាប់ផ្តើមដ៏អាក្រក់បំផុតនៅពេលដែលខ្សែការពារកណ្តាលរបស់ពួកគេត្រូវបានបណ្តេញចេញពីទីលាននៅពេលដែលទើបតែចាប់ផ្តើមប្រកួត។
Angers បានចាប់ផ្ដើមកែបាល់ចេញពេលអាជ្ញាកណ្តាលផ្លុំកញ្ចែរ ហើយបានលេង និងបញ្ជូនបាល់ទៅមុខយ៉ាងលឿនទៅដល់មុខទី Nice ដោយប្រើពេលតែមួយភ្លែតប៉ុណ្ណោះ។ ប៉ុន្តែបន្ទាប់មក Todibo បានចូលមកដណ្តើមបាល់ ហើយបានប្រព្រឹត្តកំហុសឆ្គង ធ្វើអោយ Abdallah Sima ដួលពីរបីត្រឡប់។
គាត់បានបញ្ឈប់ខ្សែប្រយុទ្ធសេណេហ្គាល់មិនអោយបន្តអូសបាល់ចូលមុខទីរបស់ខ្លួន ហើយដួលនៅភ្លាមៗ ប៉ុន្តែក្រោយមកអាជ្ញាកណ្តាលបានពិន័យកាតក្រហមយ៉ាងភ្ញាក់ផ្អើល និងបណ្តេញចេញពីទីលានភ្លាមៗ។
ហើយវាក៏បានក្លាយទៅជាកំណត់ត្រាថ្មីមួយនៅ League 1 បារាំង ដែល Todibo បានក្លាយទៅជាកីឡាករដែលបានកាតក្រហមលឿនជាងគេបំផុតក្នុងប្រវត្តិសាស្រ្តបាល់ទាត់លីគកំពូលបារាំង៕
ប្រភព៖ sportbible