បើសួរថាតាំងពីដើមមក តើកីឡាករណាដែលស្មោះនឹងក្លឹបបំផុតក្នុងអាជីពបាល់ទាត់? ចម្លើយ គឺគ្មាននរណាក្រៅពី Francesco Totti នោះឡើយ ដោយអតីតកាលបុរសសញ្ជាតិអ៊ីតាលី ឈរជើងឲ្យក្លឹបតែមួយគត់គឺ AS Romaតាំងពីចំណុចចាប់ផ្ដើម ដល់ថ្ងៃចូលនិវត្ត អស់ពេល ២៤ ឆ្នាំ។
ជោគជ័យ ទទួលបានការគោរពស្រលាញ់ជាហូរហែលើទីលាន តែងាកទៅជីវិតនៅខាងក្រៅ បុរសវ័យ ៤៥ ឆ្នាំ ហាក់រងភាពអយុត្តិធម៌ ផុតរឿងមួយចូលរឿងមួយដល់ថ្នាក់លោកធ្លាក់ទៅក្នុងជំងឺបាក់ទឹកចិត្ត ឬ Depression ហើយទើបតែបានធូរស្បើយបន្តិចនៅពេលចុងក្រោយនេះ។
ឪពុកជាទីស្រលាញ់បានស្លា.ប់បាត់បង់ជីវិត រាប់ជារឿងសោក.សង្រេងណាស់ទៅហើយ តែងាកទៅចំណងស្នេហ៍រវាងភរិយារស់នៅរួមគ្នាអស់ពេល ១៧ ឆ្នាំ ក៏ត្រូវឈានដល់ការបែកបាក់ ដោយសារវត្តមានជនទី ៣ ថែមទៀត។ Totti បានលែងលះជាផ្លូវការ ជាមួយអតីតភរិយាដែលជាតារាម៉ូដែលវ័យ ៤១ ឆ្នាំ ឈ្មោះ Ilary Blasi កាលពីខែកក្កដាកន្លងទៅ។
រំឭកទៅទំនាក់ទំនងអ្នកទាំងពីរ បានបង្កាត់ភ្លើងស្នេហ៍នៅឆ្នាំ ២០០២ ហើយឈានដល់ការរៀបអាពាហ៍ពិពាហ៍នៅ ៣ ឆ្នាំបន្ទាប់ និងបង្កើតបានចំណងដៃជាកូនប្រុសស្រី ៣ រូប មាន Cristian អាយុ ១៧ ឆ្នាំ Chanel ១៦ ឆ្នាំ និង Isabel ជាកូនពៅ ស្ថិតនៅអាយុ ៦ ឆ្នាំ។
វីរបុរសក្លឹប Roma បានមានការឈឺចាប់ខ្លាំង នៅពេលដែលលោកទទួលរងបញ្ហាផ្លូវចិត្ត ហើយក៏ជាពេលដែលត្រូវការវត្តមានភរិយាឲ្យនៅក្បែរចាំថែទាំបំផុត តែនាងបែរជាផិ.តក្បត់ទៅបញ្ឆេះស្នេហ៍ថ្មី នៅឯខាងក្រៅទៅវិញ។ នោះគឺក្រោយការចូលនិវត្តនៅឆ្នាំ ២០១៧ រំលងទៅឆ្នាំ ២០២០ Totti បានជួបរឿងអកុស.ល ដែលឪពុកបង្កើតបានទទួលមរណភាពដោយសារជំងឺ COVID-19 ហើយខ្លួនលោកផ្ទាល់ ក៏បានផ្ទុកកូវីដនៅពេលបន្ទាប់ និងចាប់ផ្ដើមធ្លាក់ខ្លួនឈឺធ្ងន់អស់ពេលជាង ២ សប្ដាហ៍។
ចន្លោះពេលនោះហើយ Totti ក៏ចាប់ផ្តើមលឺចចាមអារ៉ាមពីមាត់មនុស្សខាងក្រៅ ដែលបានឃើញភរិយាខ្លួនបណ្តើរអ្នកថ្មី នាំឲ្យលោកនៅមិនសុខ ក៏ចាប់ផ្តើមតាមដាន ហើយលួចបើកមើលទូរស័ព្ទរបស់ Ilary ដែលជាភរិយា។
យើងសង្ខេបសារដ៏ឈឺចាប់របស់ Totti មានដូចតទៅ៖ “វិបត្តិផ្លូវចិត្តធំបំផុតចាប់ផ្តើមកើតមាននៅចន្លោះខែមិនា និងមេសាឆ្នាំទៅ ក៏ប៉ុន្តែមុននោះ ក៏ខ្ញុំបានទទួលរងការឈឺ.ចាប់ជាយូរមកហើយ ខ្ញុំបានឆ្លងកាត់ដំណាក់កាលដ៏លំបាកមួយក្នុងជីវិត ទីមួយ ពេលខ្ញុំឈប់បានលេងបាល់ទាត់ ហើយប្រកាសចូលនិវត្ត បន្ទាប់មកឪពុកខ្ញុំបានស្លា.ប់ដោយសារតែជំងឺកូវីដ រួចខ្ញុំផ្ទាល់ក៏ទទួលរងការវាយលុកដោយសារជំងឺនោះអស់រយៈពេល ១៥ ថ្ងៃផងដែរ”។
“ងាកទៅប្រពន្ធរបស់ខ្ញុំ នៅពេលដែលខ្ញុំត្រូវការនាងខ្លាំងបំផុត បែរជាមិនមានវត្តមានរបស់នាង ហើយខែកញ្ញាឆ្នាំទៅ ក៏មានពាក្យក្បែរត្រចៀកកើតឡើង ថាឃើញ Ilary នៅជាមួយបុរសផ្សេងនៅខាងក្រៅច្រើនសារមកហើយ”។
“សម្រាប់ខ្ញុំ ២០ ឆ្នាំមកនេះ មិនដែលធ្វើទង្វើបែបហ្នឹងដាក់នាងឡើយ ខ្ញុំចាប់ផ្តើមសង្ស័យ រួចក៏ទៅតាមដានឃ្លាំមើលទូរស័ព្ទរបស់នាង ហើយឃើញសារដែលពួកគេផ្ញើហៅគ្នាឡើងសណ្ឋាគារ ទាំងអស់ហ្នឹង ជាហេតុផលនាំឲ្យខ្ញុំកើតជំងឺបាក់ទឹកចិត្ត ខ្ញុំចាប់ផ្តើមគេងលែងលក់ ព្យាយាមបន្លប់ខ្លួនឯង ថាគ្មានរឿងអ្វី ដែលខ្ញុំលែងជាខ្លួនខ្ញុំដូចពីមុនទៀតហើយ”៕
ប្រភព៖ បរទេស