ក្រុមជម្រើសជាតិបាល់ទាត់កម្ពុជាក្រោមអាយុ២០ឆ្នាំ បានអស់ភារកិច្ចហើយក្នុងការប្រកួតវគ្គជម្រុះពានរង្វាន់ AFC U20 Championship 2022 នៅយប់មិញនេះ ក្រោយចាញ់ក្រុមម្ចាស់ផ្ទះតាជីគីស្ថានក្នុងលទ្ធផល ២-១។
ប្រកួតចុងក្រោយនៅយប់មិញនេះ ក្រុមតាជីគីស្ថានបានដាក់សម្ពាធមកលើក្រុមកម្ពុជាជាខ្លាំង ព្រោះពួកគេទាមទារឈ្នះប្រកួតនេះដើម្បីបានកៅអីឡើងទៅវគ្គបន្ដ។ ជាលទ្ធផលឃើញថាពួកគេពិតជាបានសម្រេចដូចបំណងមែន ដោយយកឈ្នះកម្ពុជាបានក្នុងលទ្ធផល ២-១។ ជាមួយបរាជ័យនេះដែរ សម្រាប់ក្រុម U20 កម្ពុជាវិញត្រូវធ្លាក់ចេញទៅហើយ ដោយឆ្លងកាត់៣ប្រកួតកន្លងមក មានត្រឹម១ពិន្ទុប៉ុណ្ណោះ។
សម្រាប់ក្រុមតាជីគីស្ថានវិញ ឈរនៅលេខ១ក្នុងពូល បានកៅអីឡើងទៅវគ្គបន្ដ។ ក្រុមលេខ២ លីបង់ ដែលយកឈ្នះលើក្រុមសិង្ហបុរីដល់ទៅ ៦-១ នោះមិនទទូលបានកៅអីលេខ២ល្អបំផុត ដើម្បីឡើងវគ្គបន្ដឡើយ។ សិង្ហបុរី នៅលេខ៣ មាន២ពិន្ទុ ស្របពេលក្រុមកម្ពុជានៅលេខ៤បាតតារាង មាន១ពិន្ទុ៕