ខ្សែប្រយុទ្ធ Lionel Messi រកបាន១គ្រាប់ជួយក្រុម PSG បន្ដកំណត់ត្រាល្អ យកឈ្នះលើក្រុម Lyon បានក្នុងលទ្ធផល ១-០ ក្នុងការប្រកួតពានរង្វាន់លីគកំពូលបារាំង Ligue1 ។
PSG នារដូវកាលនេះ ឃើញថាមានទម្រង់លេងល្អប្រសើរមិនថាតែនៅលីគកំពូលនោះទេ ពោលគឺនៅ UEFA Champions League ក៏ពួកគេធ្វើបានល្អផងដែរ។ នៅយប់មិញនេះ ក្នុងការប្រកួតលីគ Ligue1 ក្រុមរបស់លោក Galtier បានយកឈ្នះលើក្រុម Lyon ក្នុងលទ្ធផល ១-០ ទៀត ដោយ១គ្រាប់នោះដែររកបានដោយខ្សែប្រយុទ្ធ Lionel Messi នៅនាទីទី៥ដើមតង់ទី១ ដោយកីឡាករ Neymar ជាអ្នកបោះបាល់ឱ្យ។ ១គ្រាប់នេះ រក្សារហូតដល់ចប់ការប្រកួត ហើយ PSG យកបាន៣ពិន្ទុបន្ថែមទៀត ដើម្បីឈរនៅកំពូលតារាង មាន២២ពិន្ទុ ឆ្លងកាត់៨ប្រកួត។
ដោយឡែកសម្រាប់ Messi វិញ នេះជាគ្រាប់បាល់ទី៤ហើយក្នុងលីគនៅរដូវកាលនេះ។ គេ លេងសហការជាក្រុមបានល្អជាមួយ Neymar និង Mbappe ដោយខ្សែប្រយុទ្ធទាំង៣នេះ កំពុងធ្វើព្យុះភ្លៀងខ្លាំងនៅលីគបារាំង និងក្របខណ្ឌ UEFA Champions League នារដូវកាលនេះ៕