ក្រុមអធិរាជស Real Madrid កំពុងបន្ដកំណត់ត្រាឈ្នះ១០០%នារដូវកាលនេះ ក្រោយពីយកឈ្នះលើក្រុម Atletico Madrid បានក្នុងលទ្ធផល ២-១ ក្នុងពានរង្វាន់ La Liga ។
ជំនួប Madrid Derby នៅយប់មិញនេះ បានបញ្ចប់ទៅក្នុងលទ្ធផល ក្រុមភ្ញៀវ Real Madrid យកឈ្នះលើក្រុមម្ចាស់ផ្ទះ Atletico Madrid ក្នុងលទ្ធផល ២-១។ ដោយ២គ្រាប់របស់ក្រុមភ្ញៀវនោះដែរ កើតចេញពីខ្សែប្រយុទ្ធ Rodrygo ១គ្រាប់ និងខ្សែបម្រើ Fede Valverde ១គ្រាប់។ ជាមួយការឈ្នះនេះទៀតដែរ ក្រុមរបស់លោក Carlo Ancelotti កំពុងកាន់កំណត់ត្រាពិសេសមួយហើយ ពៅលគឺជាក្រុមតែមួយគត់នៅអឺរ៉ុបដែលលេងឈ្នះ១០០%តែម្ដងនាត្រឹមដើមរដូវកាលនេះ។
ស្របពេលជាមួយគ្នានេះដែរ ក្រុម Real Madrid កំពុងដណ្ដើមយកកន្លែងលេខ១នៅកំពូលតារាងពី ក្រុម Barcelona បានវិញផងដែរ។ នៅពេលនេះ ពួកគេមាន១៨ពិន្ទុឆ្លងកាត់៦ប្រកួត ស្របពេលក្រុមអ្នកមានបុណ្យ Barcelona វិញនៅលេខ២ មាន១៦ពិន្ទុ ឆ្លងកាត់៦ប្រកួតដូចគ្នា។ ក្រុម AT Madrid នៅលេខ៧ឯណោះ មាន១០ពិន្ទុ៕