រដូវកាលចាស់ជាម្ចាស់ពានស្បែកជើងមាស រកបាន ២៣ គ្រាប់ស្មើ Mohamed Salah ដល់តែចូលមកដល់រដូវកាលថ្មី កីឡាករកូរ៉េខាងត្បូង Son Heung-min បែរជាប់គាំងម៉ាស៊ីន មិនអាចរកគ្រាប់បាល់សូម្បីតែមួយ នៅ ៨ ប្រកួតដំបូង។ រហូតដល់ថ្នាក់លោក Antonio Conte ក៏រាងអស់ជំនឿ ហើយសម្រេចដាក់ឲ្យខ្សែប្រយុទ្ធវ័យ ៣០ ឆ្នាំ អង្គុយបម្រុងនៅប្រកួតទល់ក្លឹបបាតតារាង Leicester City កាលពីយប់មិញ។
តែយ៉ាងណាគ្រប់យ៉ាងហាក់ផ្ទុយស្រឡះពីការគិត ដោយទម្រង់លេងគ្រាប់ពេជ្រអាស៊ី Son ដូចត្រូវគេបត់ ១៨០ ដឺក្រេ ផ្លាស់ពីស៊ុតមិនសម្រេច កាច់មកក្លាយជាគ្រាប់បាល់កើតឡើងផ្ទួនៗ ត្រឹមពេល ១៣ នាទីរកបាន ៣ គ្រាប់។ នៅបញ្ចប់តង់ទី ១ លទ្ធផលបណ្តោះអាសន្នរវាងក្រុមទាំងពីរ គឺស្មើ ២-២ លុះចូលដល់តង់បន្ទាប់ Rodrigo Bentancur ក៏ថែមគ្រាប់បាល់នាំមុខនៅនាទី ៤៧ ហើយរឿងអស្ចារ្យចាប់កើតឡើង ក្រោយការផ្លាស់ចូលវត្តមានខ្សែប្រយុទ្ធកូរ៉េខាងត្បូង។
នៅនាទី ៥៩ Richarlison ចេញ ដាក់ឲ្យ Son Heung-min ចូលជំនួស ហើយនៅនាទី ៧៣ ក៏អាចរកបានគ្រាប់បាល់ដំបូងប្រចាំរដូវកាល រួចរំលងដល់នាទី ៨៤ ក៏បន្ថែមគ្រាប់បាល់ទីពីរ សុទ្ធសឹងជាគ្រាប់បាល់គុណភាព សុទ្ធកាច់ក្រៅប្រអប់។ មិនទាន់ចប់ត្រឹមប៉ុណ្ណឹងទេ ឆ្លងតែ ២ នាទីបន្ទាប់ ចង្វាក់វាយបកលឿនៗរបស់ Spurs ក៏កើតផលជាថ្មី ហើយអនុញ្ញាតឲ្យ Son អាចស៊ុតគ្រាប់បាល់ទី ៣ ជាគ្រាប់ Hat-trick បើកឆាក ប្រចាំរដូវកាលនេះ។
៣ គ្រាប់ត្រឹមចន្លោះពេល ១៣ នាទីជារឿងអស្ចារ្យមួយហើយ តែអ្វីដែលកាន់តែគួរឲ្យស្ងើចសរសើរ គឺក្រោកចេញពីកៅអីបម្រុង ដែលនេះបានរុញឲ្យឈ្មោះរបស់ Son ក្លាយជាកីឡាករដំបូងក្នុងប្រវត្តិសាស្ត្រក្លឹប Spurs បង្កើតឡើង ១៤០ ឆ្នាំមកហើយ អាចរកបាន Hat-trickនៅ Premier League ក្នុងនាមជាកីឡាករ មិនជាប់ជម្រើស ១១ នាក់ដំបូង។
កំណត់ត្រានេះ បើរាប់ជារួមធៀបនឹងក្លឹបដទៃទាំងអស់ គឺខកខានកើតមានតាំងពីខែកញ្ញា ឆ្នាំ ២០១៥ ដែល Steven Naismith ជាកីឡាករបម្រុងរបស់ Everton ផ្លាស់ចូលមករកបាន Hat-trick ទល់ក្លឹប Chelsea យកឈ្នះ ៣-១។
បន្ថែមពីនេះដែរ វាក៏ជាគ្រាប់បាល់ Hat-trick លើកទី ៤ របស់ Tottenham ស៊ុតទល់ក្លឹប Leicester City នៅ Premier League ដោយពីមុនមកមិនធ្លាប់មានការបញ្ចប់ទី Hat-trick ណាទល់ក្លឹបទោលច្រើនជាងជំនួបនេះឡើយ។
ក្រោយចប់ការប្រកួត អ្នកចាត់ការលោក Antonio Conte ក៏បានបញ្ជាក់បែបនេះ៖ “Son គេអត់អាចរកបានគ្រាប់បាល់ទាល់តែសោះនៅដើមរដូវកាល ហើយថ្ងៃនេះ ១៣ នាទី រកបាន ៣ គ្រាប់ អ៊ីចឹងខ្ញុំក៏និយាយបែបលេងសើចទៅកាន់គេ ថាប្រកួតក្រោយគួរតែអង្គុយបម្រុងទៀត ដើម្បីទទួលបានលទ្ធផលល្អបែបនេះជាថ្មី”។
គួររំឭកឲ្យដឹង ប្រកួតបន្ទាប់ក្លឹបមាន់ខ្នាយមាសនឹងទទួលភារកិច្ចធំ នោះគឺការចូលជួបម្ចាស់ដី Arsenal នាវេលាម៉ោង ០៦:៣០ នាទីល្ងាច ថ្ងៃសៅរ៍ ទី ០១ តុលា មានផ្សាយផ្ទាល់លើទំព័រ CTS SPORT៕
ប្រភព៖ បរទេស