បាល់ទាត់ជាកីឡាមួយប្រភេទ ដែលទទួលបានការគាំទ្រខ្លាំងបំផុតនៅទូទាំងសកលលោក ជាហេតុនាំឲ្យកីឡាករអាជីពស្ថិតនៅកម្រិតកំពូល ក៏រមែងអាចរកបានចំណូលជាច្រើនរយលានក្នុងមួយឆ្នាំៗ។ មិនត្រឹមតែប្រាក់ចំណូល កើតចេញពីញើសឈាមហូរស្រក់លើទីលានបាល់ទាត់ ទៀតសោតកេរ្តិ៍ឈ្មោះរបស់ពួកគេក៏អាចទាក់យកចំណូលចេញពីក្រុមហ៊ុន ជាម្ចាស់ឧបត្ថម្ភដទៃនៅខាងក្រៅទីលានថែមទៀតផង។
បើតាមទិន្នន័យរៀបរៀងពី Sportico យើងធ្វើការបង្ហាញបញ្ជីឈ្មោះកីឡាករទាំង ១០ ដែលអាចរកបានប្រាក់ចំណូលច្រើនបំផុតក្នុងឆ្នាំ ២០២២៖
១០) Antoine Greizmann
អំពីប្រាក់ពលកម្មសុទ្ធ កីឡាករបារាំងរកបាន ២២ លានដុល្លារ/ឆ្នាំ ពីក្លឹប At Madrid&Barcelona ហើយថែម ៥,៥ លានដុល្លារផ្សេងទៀត ពីកិច្ចព្រមព្រៀងជាមួយម្ចាស់ឧបត្ថម្ភផ្សេងៗនៅខាងក្រៅ នាំឲ្យចំណូលសរុប ទទួលបាន ២៧,៥ លានដុល្លារក្នុងឆ្នាំនេះ។
៩) Kevin de Bruyne
ជាកីឡាកររកបានប្រាក់ចំណូលខ្ពស់បំផុត ប្រចាំក្លឹប Manchester City ដោយទាំងប្រាក់ពលកម្ម និងកុងត្រាជាមួយដៃគូសហការ សម្រាប់កីឡាករបែលហ្សិកអាចរកបាន ២៩ លានដុល្លារនៅឆ្នាំ ២០២២។ De Bruyne បានទទួលកិច្ចព្រមព្រៀង រវាងភាគីក្រុមហ៊ុន Nike, Credit Karma, Veo និង Secret Lab ជាដើម។
៨) Raheem Sterling
បច្ចុប្បន្ននៅ Chelsea គេអាចរកបាន ៣៨៤ ០០០ ដុល្លារ/សប្តាហ៍ នាំឲ្យចំណូលទាំងជាមួយក្លឹបចាស់ថ្មី ទទួលបាន ២១,៤ លានដុល្លារ បូកនឹងប្រាក់ឧបត្ថម្ភពីក្រុមហ៊ុន Puma ផង ក៏នាំឲ្យប្រាក់រកបានសរុបឡើងដល់ ២៩,៤ លានដុល្លារ។
៧) Andres Iniesta
បើទោះបីចាកចេញពីក្របខ័ណ្ឌកំពូលអឺរ៉ុបហើយក្តី តែកីឡាករអេស្ប៉ាញក៏កំពុងសម្ងំកើបលុយទាំងបាច់ជាមួយក្លឹប Vissel Kobe នៅឯប្រទេសជប៉ុន។ កិច្ចព្រមព្រៀងជាមួយក្រុមហ៊ុននៅខាងក្រៅ លេចលឺថា Iniesta សហការដល់ទៅ ១០ ក្រុមហ៊ុនឯណោះ ជាហេតុនាំឲ្យចំណូលនៅឆ្នាំ ២០២២ រកបានដល់ទៅ ៣០ លានដុល្លារ។
៦) Eden Hazard
ទម្រង់លេងធ្លាក់ចុះទុកមួយឡែក តែប្រាក់ពលកម្មដ៏ក្រាស់ក្រែល Real Madrid នៅបន្តបើកឲ្យដដែល។ នៅឆ្នាំ ២០២២ នេះ កីឡាករបែលហ្សិករកបានសរុប ៣១,៣ លានដុល្លារ។
៥) Mohamed Salah
ខ្សែប្រយុទ្ធសញ្ជាតិអេហ្សីប ជាមួយការបន្តកុងត្រាថ្មី ក៏នាំឲ្យចំណូលកាន់តែកើនឡើង ហើយអាចរំកិលមកឈរលេខ ៥ ដោយប្រាក់ចំណូលសរុប រកបានដល់ទៅ ៣៩,៥ លានដុល្លារ។ នេះកើតចេញពីប្រាក់ពលកម្មមួយផ្នែកធំ ដែល Liverpool ផ្តល់ឲ្យ ៤១៣ ០០០ ដុល្លារថេររៀងរាល់អាទិត្យ។
៤) Neymar Jr
បើធៀបនឹងកីឡាករ ៦ រូបពីខាងលើ គឺ Neymar អាចទទួលបានចំណូលពីដៃគូឧបត្ថម្ភច្រើនជាងគេបង្អស់ ដល់ទៅ ៣៥ លានដុល្លារ ហើយបូកប្រាក់ឈ្នួល ៥៦ លានដុល្លារពី PSG ផង នាំឲ្យប្រាក់ទទួលបានសរុបគឺ ៩១ លានក្នុងឆ្នាំនេះ។
៣) Lionel Messi
កុងត្រានៅក្លឹប PSG ក៏កីឡាករអាហ្សង់ទីននៅបន្តរកបានប្រាក់ឈ្នួលដ៏ច្រើនមហាសាលផងដែរ ពោលដល់ទៅ ៦២ លានដុល្លារឯណោះ ហើយខាងក្រៅទីលានក៏កើបលុយពីក្រុមហ៊ុនធំៗដូចជា Socios, Adidas, Budweiser និង Mastercard ជាដើម នាំឲ្យចំណូលរួមឡើងដល់ ១១០ លានដុល្លារអាមេរិក។
២) Cristiano Ronaldo
បើ Messi មិនឈរលេខ ១ គឺមានតែ Ronaldo ក៏ប៉ុន្តែឆ្នាំនេះប្លែក CR7 បែរត្រឹមឈរលេខរៀងទី ២ ប៉ុណ្ណោះ ហើយរកបានប្រាក់ចំណូលសរុប ១១៣ លានដុល្លារ។ ៥៣ លានកើតចេញពីប្រាក់ឈ្នួលនៅ Man Utd និង ៦០ លានផ្សេងទៀត ជាប្រាក់ទទួលបាន ពីយីហោល្បីៗដែលជាដៃគូឧបត្ថម្ភ។
១) Kylian Mbappe
ម្ចាស់ជើងឯក World Cup ជំនាន់ឆ្នាំ ២០១៨ ក្រោយការចុះហត្ថលេខាកុងត្រាថ្មីឲ្យ PSG ក៏ស្រាប់តែរំកិលឈ្មោះមកឈរលេខ ១ ដែលចាំបានថា កាលឆ្នាំទៅ ២០២១ គេឈរនៅលេខរៀងទី ៤ ឯណោះ។
ប្រាក់ឧបត្ថម្ភខាងក្រៅ មិនសូវជាកើនឡើងប៉ុន្មានទេ តែងំត្រង់ប្រាក់ពលកម្ម PSG ផ្តល់ឲ្យ ១០៥ លានដុល្លារ/ឆ្នាំ នាំឲ្យចំណូលរួមក្នុងនាមជាកីឡាករបាល់ទាត់លំដាប់ទី ១ ក្នុងលោក ទទួលបានសរុប ១២៥ លានដុល្លារ៕
ប្រភព៖ បរទេស