មួយរយៈក្រោយនៅក្របខ័ណ្ឌ Premier League បានលើកពេលប្រកួតជាបន្តបន្ទាប់ ដូចក្លឹបខ្លះ ខកខាន ២ ជុំទៅហើយ រាប់មកទល់ចុងសប្ដាហ៍នេះ។ ក៏ដោយសារតែរដ្ឋាភិបាលអង់គ្លេសតម្រូវឲ្យមានការរៀបចំការគោរពចំពោះការសោយទិវង្គតរបស់ម្ចាស់ក្សត្រី Elizabeth II។
ជាក់ស្តែងដូចជំនួប Chelsea ទល់ Liverpool, Man Utd ទល់ Leeds United ជាដើម ត្រូវបានលើកពេល ដែលនាំឲ្យកាលវិភាគប្រកួតនឹងកាន់តែស្មុគស្មាញ ហើយមិនច្បាស់ថាត្រូវពន្យារទៅដាក់នៅថ្ងៃបន្ទាប់ណាមួយ ដ្បិតបើពេលវេលា International Break ក៏ត្រូវចាប់ផ្តើម នៅកំឡុងពេល ២ សប្តាហ៍ខាងមុខនេះទៀត។
ហេតុនេះហើយ ខាងសមាគមបាល់ទាត់អឺរ៉ុប UEFA ក៏ចង់ជួយសម្រួល ជៀសវាងក្លឹបនៅ Premier League ទាំងអស់មិនអាចសម្រេចទៅតាមកាលវិភាគប្រកួត ហើយធ្វើឲ្យប៉ះពាល់ដល់ការប្រកួត World Cup នៅឯចុងឆ្នាំ។ ដំណោះស្រាយគឺ UEFA ចង់អនុញ្ញាតឲ្យក្លឹបដែលបានលើកពេល អាចបើកការប្រកួតនាពាក់កណ្តាល នៅចន្លោះថ្ងៃអង្គារ ថ្ងៃពុធ និងថ្ងៃព្រហស្បតិ៍ ដែលជាទូទៅតាមច្បាប់បាល់ទាត់អឺរ៉ុប ក្នុងដំណើរការពានរង្វាន់ UEFA កំពុងចាប់ផ្តើម ក្លឹបទាំងអស់មិនអាចរៀបចំការប្រកួតណាមួយ នៅពាក់កណ្តាលសប្តាហ៍បានឡើយ។
តែនេះក្នុងករណីលើកលែង និងដើម្បីជួយសម្រួលឲ្យគ្រប់ការប្រកួតទាំងអស់អាចប្រព្រឹត្តិទៅទាន់ពេលវេលា អ៊ីចឹងជំនួប Premier League ក៏រំពឹងអាចកើតឡើងបានទាំងនៅចុងអាទិត្យ និងពាក់កណ្ដាលសប្ដាហ៍ព្រមគ្នានៅពេលខាងមុខណាមួយ។ នេះយើងរង់ចាំការសម្រេចរបស់គណៈកម្មការបាល់ទាត់អឺរ៉ុបជាមុនសិន ថានឹងអនុញ្ញាតជាផ្លូវការឬអត់៕
ប្រភព៖ Daily Star