បើទោះបីអតីតគ្រូបង្គោលលោក Thomas Tuchel បានចាកចេញទៅហើយក្តី តែកីឡាករគោលដៅលោកធ្លាប់ចាប់អារម្មណ៍ ក៏បន្តស្ថិតក្នុងការចង់បានពីសំណាក់ថ្នាក់លើមួយចំនួននៃក្លឹប Chelsea ដដែល ហើយរង់ចាំតែពេលវេលាល្អមកដល់ និងបើកការចរចាជាក់ជាមិនខាន។
នោះគឺ Declan Rice សមាជិករបស់ក្លឹបញញួរធំ West Ham United ដែល Tuchel បានឃ្លាំមើលខ្សែបម្រើសញ្ជាតិអង់គ្លេសអស់កាលជាយូរ តែចរចាមិនបានសម្រេច ដ្បិតអីខាងក្លឹបអាណាព្យាបាលហាក់មិនបើកផ្លូវទាល់តែសោះ។ យ៉ាងណាទីផ្សារដោះដូរខែមករាខាងមុខ ក៏ក្លឹបម្ចាស់ដី Stamford Bridge នឹងងាកទៅជជែកម្តងទៀត តែសារនេះ ក្រោមការដឹកនាំរបស់គ្រូថ្មី លោក Graham Potter។
បើតាមអ្នកកាសែតលោក Dean Jones បានប្រាប់ទៅ GiveMeSport យ៉ាងដូច្នោះថា៖ “ការចាកចេញរបស់ Thomas Tuchel ពុំបានផ្លាស់ប្តូរចក្ខុវិស័យរបស់ Chelsea ដែលសម្លឹងមើល Declan Rice ឡើយ នេះក៏នៅតែមានថ្នាក់លើក្លឹបបន្តចាប់អារម្មណ៍លើកីឡាកររូបនេះដដែល ពោលរង់ចាំតែពេលវេលាល្អមកដល់ប៉ុណ្ណោះ”។
គួរបញ្ជាក់ដែរថា ខាង West Ham ដាក់តម្លៃ Rice ដល់ ១៥០ លានផោន ជាទំហំអាចរុញឲ្យគេ ក្លាយជាកីឡាករអង់គ្លេសមានតម្លៃផ្ទេរខ្ពស់បំផុតក្នុងប្រវត្តិសាស្រ្តបើអាចសម្រេចទៅបាន។ នេះ Chelsea ទំនងរង់ចាំការធ្លាក់ថ្លៃបន្តិចសិន ខណៈសុពលភាពកុងត្រាកីឡាករសេសសល់ដល់ចុងខែមិថុនា ឆ្នាំ ២០២៤៕
ប្រភព៖ Sportsmole