ខ្សែប្រយុទ្ធ Vinicius Jnr ថាមិនញញើតចំពោះសម្ដីរបស់កីឡាករ Koke នោះទេ ហើយថានឹងបន្ដរាំដាល់មុខទៀត ប្រសិនបើរូបគេស៊ុតចូលក្រុម Atletico Madrid នាចុងសប្ដាហ៍នេះ។
Pedro Bravo ប្រធានសមាគមភ្នាក់ងារអេស្ប៉ាញ បានហៅ Vinicius ថាធ្វើដូចស្វានៅពេលគេស៊ុតចូលទីដៃគូ ហើយអបអរដោយការរាំសប្បាយរីករាយនោះ។ ស្របពេលកីឡាករ Koke វិញក៏និយាយស្រដៀងគ្នានេះដែរ។ ខ្សែបម្រើរបស់ក្រុម AT Madrid បានអះអាងថាប្រសិនបើគេបន្ដរាំនៅពេលស៊ុតចូលក្រុមខ្លួន នោះនឹងមានរឿងកើតឡើងមិនខាន។ Koke ដាស់តឿនមិនឱ្យ Vinicius រាំទៀតនោះទេ។
ដោយឡែកសម្រាប់រឿងនេះដែរ មានមតិជាច្រើនបានលើកឡើងនិងគាំទ្រដល់ Vinicius ឱ្យបន្ដធ្វើទៀត ព្រោះជាសិទ្ធិរបស់គេ។ មួយវិញទៀត សាមីខ្លួនក៏បានចេញមុខមកបញ្ជាក់ទៀតផងដែរ។ កីឡាកររបស់ក្រុម Real Madrid បាននិយាយថារូបគេនឹងបន្ដធ្វើបែបនេះទៀតក្នុងការអបអរគ្រាប់បាល់ ដោយមិនខ្លាចចំពោះការគំរាមរបស់ Koke អ្វីនោះទេ៕