ក្រុមតោខៀវ Chelsea នឹងចូលខ្លួនប្រជែងជាមួយក្រុមហង្សក្រហម Liverpool ក្នុងការដេញថ្លៃទិញយកខ្សែបម្រើប្រយុទ្ធ Jude Bellingham ពីក្រុម Dortmund ។
Jude Bellingham បានក្លាយជាកីឡាករឆ្នើមម្នាក់នាពេលបច្ចុប្បន្ននេះ បន្ទាប់ពីបង្ហាញទម្រង់លេងយ៉ាងល្អជាមួយក្រុម Dortmund ។ ក្រុម Liverpool បានបង្ហាញចំណាប់អារម្មណ៍ចង់បានគេជាខ្លាំង ដោយរំពឹងថានឹងមានការដេញថ្លៃនៅខែមករាដើមឆ្នាំ២០២៣ខាងមុខតែម្ដង។ តែនៅពេលនេះ ក៏ស្រាប់តែមានដំណឹងថាក្រុម Chelsea ឯណោះវិញ ក៏ប្រាថ្នាចង់បានកីឡាករអង់គ្លេសម្នាក់នេះផងដែរ។ ដោយលោក Todd Boehly ប្រធានក្លឹប Chelsea ដាក់រូបគេក្នុងបញ្ជីឈ្មោះដែលត្រូវនាំចូលសម្រាប់រដូវកាលក្រោយ។
រំលឹកថាក្រុម Chelsea កាលពីរដូវកាលដោះដូរកីឡាករកន្លងទៅនេះ ពួកគេបានចំណាយប្រាក់អស់២៧១លានផោនឯណោះក្នុងការទិញកីឡាករថ្មីចូល។ តែការនាំចូលមកនោះ នៅមិនទាន់បានល្អនោះទេ រហូតដល់លោក Thomas Tuchel ត្រូវបានបណ្ដេញចេញពីតំណែងអ្នកចាត់ការថែមទៀត។ នៅពេលនេះលោក Potter មកដឹកនាំក្រុម Chelsea ម្ដង ហើយប្រកួតបើកឆាកដំបូងកន្លងទៅលេងស្មើក្រុម Salzburg ក្នុងលទ្ធផល ១-១ ៕