បើនិយាយតែលីគកំពូលទាំង ៥ ប្រចាំតំបន់អឺរ៉ុប គឺសល់តែក្លឹប Real Madrid មួយប៉ុណ្ណោះ ដែលបន្តអត្រាឈ្នះ ១០០ ភាគរយ មិនថាតែនៅក្របខ័ណ្ឌ La Liga និង UEFA Champions League។ មិនដែលស្គាល់រសជាតិស្មើ ឬចាញ់ ពោលគ្រប់ការប្រកួតទាំងអស់ មានតែជ័យជម្នះ ហើយនេះក៏គួរអរគុណជាពិសេសដល់គុណភាពដឹកនាំរបស់អ្នកចាត់ការលោក Carlo Ancelotti និងការខិតខំរបស់កីឡាករក្នុងក្រុមទាំងមូល។
តែយ៉ាងណានៅ ២ ប្រកួតចុងក្រោយ អ្នកគាំទ្រហាក់ផ្ទុះការចាប់អារម្មណ៍ និងកោតសរសើរមិនដាច់ពីមាត់ ដល់ខ្សែបម្រើសញ្ជាតិអ៊ុយរុយហ្គាយ Federico Valverde។ កីឡាករវ័យ ២៤ ឆ្នាំ ហាក់សកម្មខ្លាំង តាំងពីប្រកួតទល់ Mallorca ដោយតំណែងរបស់គេលើទីលាន ត្រូវបានអ្នកចាត់ការបត់ចេញពីបម្រើមកកាន់ប្រយុទ្ធស្លាប ហើយលទ្ធផលចេញមក គឺនៅតែល្អឥតខ្ចោះ។
បន្ទាប់ពីកីឡាករសំខាន់ Karim Benzema ជួបបញ្ហារបួស ក៏ស្រាប់អ្នកចាត់ការ Ancelotti នឹកឃើញចេះច្នៃប្រើយុទ្ធសាស្រ្តថ្មី ដោយទាញ Valverde ឲ្យមកលេងនៅប្រយុទ្ធស្លាបស្តាំ ហើយដាក់ Vinicius Jr នៅខាងឆ្វេងដដែល ខណៈដែលតំបន់ប្រយុទ្ធយក Rodryo មកបំពេញ។ ផែនការណ៍នេះ ឃើញថាបានផលដូចការចង់បាន នៅប្រកួតទល់ RB Leipzig ដែល Real Madrid យកឈ្នះ ២-០។
ងាកទៅមើលការលេងរបស់ កីឡាករជំនាញជើងស្តាំ មិនត្រឹមតែល្អនៅប្រកួតទល់ Mallorca ប៉ុណ្ណោះទេ ទៀតសោតបន្តមកដល់ក្របខ័ណ្ឌ Champions League ក៏នៅតែអាចរកបានគ្រាប់បាល់ផងដែរ។ ស្ថិតិបង្ហាញខ្លួន ៨ ប្រកួតរដូវកាលនេះ រកបាន ៣ គ្រាប់និង Assist ២ លើក ហើយកីឡាករកំពុងទទួលបានការសរសើរអស់ពីចិត្ត ដល់ថ្នាក់អ្នកចាត់ការ ហ៊ានយកការចូលនិវត្តមកប្តូរជាមួយគ្រាប់បាល់របស់កីឡាករទៀតផង។
អ្នកចាត់ការសញ្ជាតិអ៊ីតាលី និយាយកន្លងទៅថា៖ “វាចម្លែកត្រង់ថា ឆ្នាំទៅ Valverde គេរកបានតែមួយគ្រាប់គត់ ហើយខ្ញុំគិតយូរទៅ កីឡាករល្អដូចជាគេ យ៉ាងហោចណាស់គួរតែរកបានតូចបំផុត ១០ គ្រាប់/រដូវកាល អ៊ីចឹងបើយើងជាគ្រូ យើងមិនចេះច្នៃប្រើប្រាស់គេឲ្យកើតផ្លែផ្កាទេនោះ ម្ល៉េះគួរតែហែកចោលអាជ្ញាប័ណ្ណគ្រូបង្វឹក ហើយចូលនិវត្តតែម្តងទៅ”។
លោកបន្ត៖ “ដូចគ្រាប់បាល់កន្លងទៅ គេប្រើជើងឆ្វេង ខ្ញុំអត់ធ្លាប់ឃើញ Valverde ធ្វើបានបែបហ្នឹងពីមុនមកទេ នេះកំពុងបង្ហាញពីភាពជឿជាក់ ពីគុណភាពដ៏ក្រាស់ក្រែល គេមានអ្វីផ្សេងទៀតលើសពីថាមពល តែបើឲ្យនិយាយថា គេកំពុងជាកីឡាករល្អបំផុតក្នុងលោក នៅតំណែងដែលកំពុងលេង នោះយើងប្រហែលត្រូវរង់ចាំមើលបន្តិចទៀត សឹមនិយាយកើត”។
ងាកទៅអ្នកគាំទ្រលើបណ្តាញសង្គមឯណោះ ក៏និយាយដែរថា Valverde សក្តិសមជាអនាគតប្រធានក្រុម Real Madrid នៅពេលខាងមុខ ព្រោះនេះជាកីឡាករដែលអាចលេងបានល្អទាំងតំណែងការពារ បម្រើ ឬសូម្បីតែជាស្លាបប្រយុទ្ធ ហើយម្នាក់នេះមិនចេះត្អូញត្អែរ ទោះមិនសូវទទួលបានពេលវេលាឈរជើងកន្លងមក រួចរឿងប្រាក់ពលកម្មក៏មិនចេះរំអុកក្លឹបដូចកីឡាករដទៃ ចំណែកអ្វីដែលសំខាន់មិនធ្លាប់មានរឿងអាស្រូវពីមុនមកឡើយ។
គួរបញ្ជាក់ដែរថា Valverde ត្រូវបានក្លឹប Real Madrid ទិញចេញពីក្លឹបដំបូងរបស់គេ គឺ Penarol កាលពីរដូវក្តៅ ឆ្នាំ ២០១៦ ហើយយកមកដុសខាត់ អភិវឌ្ឍខ្លួននៅថ្នាល Castilla អស់ពេល ២ ឆ្នាំ មុនសម្រេចដាក់ឈ្មោះឲ្យមកលេងនៅឈុតធំ។ កាលនោះ ក្លឹបចាយអស់តែ ៥ លានអឺរ៉ូប៉ុណ្ណោះ ខុសពីតួលេខហាងឆេងបច្ចុប្បន្ន កើនដល់ ៧០ លានអឺរ៉ូ ពោលជាទំហំចំណេញ ១ គុណជា ១៤ បើក្លឹបអេស្ប៉ាញ ព្រមលក់គេចេញ៕
ប្រភព៖ បរទេស