ជាជាងការផ្លាស់ទៅក្លឹបបន្ទាប់ នៅឯក្របខ័ណ្ឌកំពូលអង់គ្លេស ទីបំផុត Ben Foster បានប្រកាសព្យួរស្រោមដៃ ចូលនិវត្តពីអាជីពជាកីឡាករជាផ្លូវការ។ អតីតអ្នកចាំទីវ័យ ៣៩ ឆ្នាំ បានផុតកុងត្រាក្លាយជាកីឡាករឥតតម្លៃខ្លួន ជាមួយក្លឹបចុងក្រោយ Watford កាលពីចុងខែមិថុនា ឆ្នាំ ២០២២។
យ៉ាងណាក៏មានក្លឹបសេដ្ឋីលំដាប់ទី ១ ក្នុងលោក ដែលគេស្គាល់ជា Newcastle United បានចាប់អារម្មណ៍មកលើបុរសសញ្ជាតិអង់គ្លេសផងដែរ តែសាមីខ្លួនបែរបដិសេធ ក្រោមហេតុផលមិនចង់នៅឆ្ងាយពីគ្រួសារ ហើយជ្រើសយកការចូលនិវត្តតែម្តងទៅ។
បើផ្លាស់ទៅ Newcastle ប្រហែលត្រូវឈរឈ្មោះជាអ្នកចាំទីដៃទីបី បន្ទាប់ពី Nick Pope និង Karl Darlow។ លោក Foster និយាយ៖ “តាមថាខ្ញុំក៏មិនចង់បដិសេធដែរ [ការច្រានចោលសំណើក្លឹប Newcastle] តែស្ថិតក្នុងវ័យនេះ ឲ្យខ្ញុំត្រូវនៅឆ្ងាយពីគ្រួសារ គឺជារឿងដ៏លំបាកបំផុត”។
លោកបន្ត៖ “វាជារឿងដែលពិបាកនឹងពន្យល់ ជាអារម្មណ៍ដែលពិបាកនឹងបកស្រាយទៅកាន់មនុស្សរាល់គ្នា ការដែលវាជាកិច្ចព្រមព្រៀងល្អមួយ ហើយនេះក្លឹបមានបំផុតក្នុងលោក ចង់បានខ្ញុំ តែពេលគិតដល់ត្រូវទៅរស់នៅក្នុងផ្ទះតែម្នាក់ឯង នៅ Newcastle ឆ្ងាយពីគ្រួសារ គឺខ្ញុំធ្វើអត់បានទេ ណាមួយស្ថិតក្នុងវ័យស្រករប៉ុណ្ណេះហើយ”៕
ប្រភព៖ Sportsmole