បើទោះបីនៅទីផ្សារដោះដូររដូវក្តៅ ទើបតែបិទទ្វារក្លឹប Manchester United បានចំណាយលុយមួយផ្នែកធំហើយក៏ពិតមែន តែក្លឹបក៏នឹងនៅបន្តផ្តល់កញ្ចប់ថវិកាមួយផ្នែកផ្សេងទៀត ដល់អ្នកចាត់ការលោក Erik ten Hag សម្រាប់ទីផ្សារដោះដូរ ចូលមកដល់នៅខែមករា ឆ្នាំ ២០២៣។
សមិទ្ធផលក្រោមការដឹកនាំរបស់គ្រូសញ្ជាតិហូឡង់ ក៏ឃើញថាបានផលល្អគួរសម ជាពិសេសនៅប៉ុន្មានប្រកួតចុងក្រោយក្នុងក្របខ័ណ្ឌ Premier League។ លទ្ធផលត្រួសៗគិតត្រឹមពេលនេះ United ឈរលេខ ៥ ឈ្នះ ៤ ស្មើ ២ មាន ១២ ពិន្ទុ ចាញ់ ៣ ពិន្ទុធៀបនឹងក្លឹបឈរកំពូលតារាង Arsenal រីឯនៅ UEL មាន ៣ ពិន្ទុ ឈរលេខ ២ ក្នុងពូល E។
បើតាមសារព័ត៌មាន The Sun ចុះផ្សាយថា ក្លឹបម្ចាស់ដី Old Trafford បានត្រៀមកញ្ចប់ថវិកា ៧០ លានផោនបន្ថែម ឲ្យ Ten Hag ចាយវាយនៅទីផ្សារដោះដូរខាងមុខ។ ទោះជាយ៉ាងណា បើលក់ Cristiano Ronaldo បានសម្រេចនៅពេលនោះ ក៏នឹងរំពឹងបន្ថែមលុយ ៣០ លានផោន ដូច្នេះទទួលបាន ១០០ លានផោន លើការចាយវាយនាំចូលកីឡាករថ្មី។
រំឭកថា កាលពីរដូវក្តៅ Ten Hag ចាយអស់ ២១៥ លានផោនរួចមកហើយ ជាក់ស្តែងត្រឹមតែ Lisandro Martinez និង Casemiro កីឡាករប្រេស៊ីលទាំងពីរអស់ ១២០ លានផោន។ អំពីការនាំយកអ្នកថ្មី ក្លឹបក៏តម្រូវឲ្យដកចេញអ្នកចាស់មួយចំនួនផងដែរ ជៀសវាងការចាយល្មើសច្បាប់ហិរញ្ញវត្ថុ FFP ពាក់ព័ន្ធនឹងប្រាក់ឈ្នួលឲ្យកីឡាករក្នុងក្រុម ដូច្នេះការផ្ទេរ Ronaldo ចេញម្នាក់ ឬអាចដកឈ្មោះកីឡាករមិនសំខាន់មួយចំនួន គឺពិតជារឿងចាំបាច់៕
ប្រភព៖ TalkSPORT