ក្លឹបសេះបង្កង់ Juventus ធ្វើមិនបានល្អទាល់តែសោះ មិនថាប្រកួតនៅក្របខ័ណ្ឌកំពូលអ៊ីតាលី Serie A និងក្របខ័ណ្ឌអឺរ៉ុប UEFA Champions League។ រដូវកាលថ្មី ២០២២/២៣ ក្លឹបដឹកនាំដោយអ្នកចាត់ការលោក Massimiliano Allegri កំពុងធ្វើឲ្យក្លឹបឈរលេខ ៨ នៅតារាង ឈ្នះ ២ ស្មើ ៤ មាន ១០ ពិន្ទុ ស្របពេលនៅពូល H ក្របខ័ណ្ឌ UCL ឈរលេខ ៣ មាន ០ ពិន្ទុ ប្រឈមខ្ពស់នឹងធ្លាក់ចេញត្រឹមវគ្គចែកពូល។
លទ្ធផលដ៏អាក្រក់នេះ ក៏នាំឲ្យថ្នាក់លើក្លឹបគិតចង់ដកតំណែងគ្រូសញ្ជាតិអ៊ីតាលីឲ្យបានឆាប់រហ័ស ដើម្បីស្តារស្ថានការណ៍ឡើងវិញ ក៏ប៉ុន្តែបើក្រឡេកទៅស្ថានភាពហិរញ្ញវត្ថុក្លឹប គឺមិនស៊ីចង្វាក់គ្នាទាល់តែសោះ។ បើតាមរបាយការណ៍ពី Sky Sport Italia ចុះផ្សាយ ក្លឹប Juventus ពុំមានលទ្ធភាពក្នុងការបញ្ចេញកញ្ចប់ថវិកាធំ ដើម្បីផ្តាច់កុងត្រាមុនកាលកំណត់របស់អ្នកចាត់ការបច្ចុប្បន្នឡើយ។
Allegri មានកុងត្រា ៤ ឆ្នាំ ហើយមួយរដូវកាលរកបាន ៩ លានអឺរ៉ូ នេះបើទោះបីដឹកនាំមិនបានល្អ ក៏ក្លឹបត្រូវផ្តាច់កុងត្រាចាយលើសពី ១០ លានអឺរ៉ូយ៉ាងតូចដែរ ប្រសិនចង់បញ្ចប់តំណែងបុរសសញ្ជាតិអ៊ីតាលី។ ឥឡូវមធ្យោបាយចុងក្រោយ ដោយឃើញទាល់ខ្លាំង ក្លឹបក៏សម្រេចកែប្រែតាមរយៈមូលដ្ឋានដឹកនាំពីខាងក្រោមមកវិញ មានន័យថា ដកតំណែងបុគ្គលិក ឬជំនួយការគ្រូបង្វឹកមួយចំនួនចេញ ហើយរកអ្នកថ្មីមកជំនួស ដោយជឿថានឹងអាចទទួលបានលទ្ធផលល្អជាងមុន។
ប្រកួតបន្ទាប់របស់ Juventus គឺនៅវេលាម៉ោង ០៨:០០ នាទីយប់ ថ្ងៃអាទិត្យទី ១៨ កញ្ញា ទល់ក្លឹបម្ចាស់ផ្ទះ Monza ជាប្រកួតជុំទី ៧ នៅក្របខ័ណ្ឌ Serie A ហើយត្រូវសម្រាកមួយរយៈពេលសិន កំឡុង International Break មុនត្រលប់ជាថ្មីនៅដើមខែក្រោយ៕
ប្រភព៖ Sky Sports