ក្លឹបហង្សក្រហម Liverpool ត្រូវបានគេរាយការណ៍ថា កំពុងរៀបចំផែនការណ៍ចង់លក់ចេញ Arthur Melo កាត់ទៅឲ្យក្លឹបចាស់ Juventus របស់គេវិញ នៅពេលវេលាកុងត្រាសេសសល់ខាងមុខ។ នេះក្លឹបដឹកនាំដោយលោក Jurgen Klopp ទើបតែយកខ្សែបម្រើខាងលើ នៅដើមខែកញ្ញា នាថ្ងៃចុងក្រោយបិទទីផ្សារដោះដូរ។
ទោះជាយ៉ាងណា របៀបដឹកនាំរបស់គ្រូសញ្ជាតិអាល្លឺម៉ង់ មើលទៅមិនស៊ីចង្វាក់នឹងការលេងរបស់កីឡាករសញ្ជាតិប្រេស៊ីលទាល់តែសោះ ហើយ Liverpool ក៏ដឹងមុនហើយដែរ ថាការយក Arthur គឺបង្ខំចិត្ត និងទំនុកបម្រុងក្នុងករណីចាំបាច់តែប៉ុណ្ណោះ។ នេះវាគាប់ជួនកីឡាករនៅតំបន់ស្នូលរងរបួសច្រើនពេលមុននោះ ដូច Thiago Alcantara, Naby Keita, Jordan Hendereson និង Alex Oxlader-Chamberlain។
ក្នុងកិច្ចព្រមព្រៀង ក្លឹបម្ចាស់ដី Anfield ខ្ចីជើងបុរសវ័យ ២៦ ឆ្នាំដល់ចុងខែមិថុនា ឆ្នាំ ២០២៣ តែផែនការណ៍ថ្មីរបស់ Liverpool ប្រសិនក្នុងខែមករា ក្លឹបអាចចុះហត្ថលេខាយកបានខ្សែបម្រើពេញលក្ខណៈមួយរូប នោះនឹងបង្វិលឈ្មោះកីឡាករខាងលើ ទៅឲ្យក្លឹបចាស់នៅឯអ៊ីតាលីវិញ ជាជាងរក្សាគេទុកដល់ផុតកុងត្រាខ្ចីជើង ព្រោះអីក្លឹបគ្មានបំណងទិញផ្តាច់នៅតម្លៃជាង ៣២ លានផោនឡើយ។
គោលដៅកីឡាករចង់បាន មាន Jude Bellingham ស្ថិតក្នុងរ៉ាដាអាទិភាព តែមិនច្បាស់ Dortmund ព្រមព្រលែងងាយៗ ខណៈ Nicolo Barella របស់ Inter Milan និង Ibrahim Sangare របស់ PSV Eindhoven ក៏ស្ថិតក្នុងការចង់បានរបស់លោក Klopp៕
ប្រភព៖ Sportsmole