ក្រុម U20 កម្ពុជា បានបរាជ័យក្រោមថ្វីជើងក្រុម U20 លីបង់ក្នុងលទ្ធផល ១-០ សម្រាប់ការប្រកួតបើកឆាកវគ្គសន្សំពិន្ទុតាមពូលពានរង្វាន់កម្រិតទ្វីបអាស៊ី 2023 AFC U-20 Asian Cup qualification។
ក្នុងការប្រកួតនេះដែរ កម្ពុជាបានរបូតគ្រាប់បាល់នៅនាទីទី៨ដើមតង់ទី១ ដោយកីឡាករ Mohammad Sadek ជាអ្នកធ្វើបានសម្រេច។ ក្រោយពីរបូត១គ្រាប់នោះទៅ ក្រុម U20 កម្ពុជាបានព្យាយាមរក្សាទម្រង់លេងនិងកែប្រែស្ថានភាពឡើងវិញ មិនឱ្យក្រុមលីបង់មានឱកាសទម្លាយសំណាញ់ទីទៀតនោះទេ។ មួយវិញទៀត ពួកគេក៏ព្យាយាមសម្រុកទៅវិញដើម្បីរកគ្រាប់បាល់ដែរ ប៉ុន្តែមិនអាចកើតមានឡើងបានឡើយ។ ចប់ការប្រកួត U20 កម្ពុជា ចាញ់ក្រុម U20 លីបង់ក្នុងលទ្ធផល ១-០។
ជាមួយទម្រង់លេងនៅយប់មិញនេះ អ្នកគាំទ្រនៅកម្ពុជាបានសរសើរការហ៊ានលេងរបស់ក្រុម U20 ខ្លាំង ទោះជាប៉ះក្រុមខ្លាំងកម្រិតលីបង់ ក៏ពួកគេព្យាយាមបង្កើតឱកាសផងដែរ។ កម្ពុជានៅសល់២ប្រកួតក្នុងដៃទៀត ដោយប៉ះក្រុមសិង្ហបុរីប្រកួតបន្ទាប់ និងប៉ះក្រុមម្ចាស់ផ្ទះតាជីគីស្ថាននៅប្រកួតចុងក្រោយ៕