អ្នកចាំទី David de Gea បាននិយាយថាក្រុមបិសាចក្រហម Manchester United សក្ដិសមក្នុងការលេងនៅពានរង្វាន់ UEFA Champions League មិនមែនលេងនៅ Europa League ទេ។
នៅរាត្រីនេះ ក្រុមបិសាចក្រហម Man Utd នឹងត្រូវប៉ះជាមួយក្រុម Sheriff នាពានរង្វាន់ UEFA Europa League សម្រាប់សប្ដាហ៍ទី២។ ដោយកាលពីសប្ដាហ៍ទី១កន្លងទៅ ពួកគេបានលេងចាញ់ក្រុម Real Sociedad ក្នុងលទ្ធផល ១-០ រួចទៅហើយ។ ដូច្នេះនៅរាត្រីនេះ ក្រុមបិសាចក្រហមទាមទារយក៣ពិន្ទុត្រលប់មកវិញឱ្យបានហើយ។
យ៉ាងណាមិញ មុនការប្រកួតចាប់ផ្ដើម អ្នកចាំទី David de Gea របស់ក្រុម Man Utd បាននិយាយបែបនេះថា៖ “ជារឿងពិត សម្រាប់ខ្ញុំ យើងគួរតែលេងនៅពានរង្វាន់ Champions League ប៉ុន្តែនេះជាពានដែលយើងត្រូវប្រកួតនារដូវកាលនេះ។ យើងនឹងប្រឹងប្រែងឱ្យអស់ពីសមត្ថភាព”។
សូមបញ្ជាក់ថាក្រុម Sheriff នេះដែរ ជាក្លឹបតួចមួយនៅម៉ូដូវ៉ា ប៉ុន្តែសមត្ថភាពរបស់ពួកគេមិនធម្មតានោះទេ។ កន្លងទៅ ពួកគេធ្លាប់លេងដល់ UEFA Champions League និងបានយកឈ្នះលើក្រុម Real Madrid ថែមទៀតផងក្នុងលទ្ធផល ២-១ នៅកីឡដ្ឋាន Bernabue។ កីឡដ្ឋានរបស់ពួកគេ អាចផ្ទុកអ្នកគាំទ្របាន ៨ ៨០០នាក់ប៉ុណ្ណោះ៕