កន្លងទៅ Paul Pogba ត្រូវបានជាប់ឈ្មោះជារ៉ាដាដ៏សំខាន់មួយរបស់ក្លឹប Real Madrid និង Juventus ដែលល្ហិចល្ហៀងថាតាមចង់បានអស់រយៈពេលជាយូរណាស់មកហើយ។
នៅ Real Madrid មាន Zinedine Zidane ដែលចាប់ចិត្តលើកីឡាករបារាំងជាពន់ពេក ខណៈនៅ Juventus មានភាគរយខ្ពស់ ព្រោះជឿជាក់ថាខ្សែបម្រើ United រូបនេះ មានចិត្តចង់វិលត្រលប់ទៅរកទ្រនំចាស់។
តម្លៃខ្លួនរបស់គេពីដំបូងឡើយគឺថ្លៃប្រមាណ ១៨០ លានផោន ហើយមកទល់រយៈពេលចុងក្រោយចុះត្រឹម ១២០ លានផោនតែប៉ុណ្ណោះ។ នេះបើយោងតាមការវាយតម្លៃពីសារព័ត៌មាន ESPN។
យ៉ាងណាមិញការចរចាទំនងជាមិនអាចធ្វើទៅបាននោះឡើយ ហើយ United នឹងនៅតែបន្តចងជើង Paul ដល់រដូវកាលក្រោយតទៅទៀត ព្រោះឆ្លើយតបនឹងកង្វល់ផ្នែកហិរញ្ញវត្ថុដែលក្លឹបនៅអឺរ៉ុបទាំងអស់កំពុងប្រឈម ក្នុងស្ថានភាពការរាតត្បាតនៃវីរុស COVID-19។
ណាមួយក៏មិនច្បាស់ថាកាលបរិច្ឆេទបើកទីផ្សារដោះដូរត្រូវលើកពេលឬលុបចោលបែបណាទៀត ទាំងដែលតួលេខអ្នកឆ្លង COVID-19 នៅអឺរ៉ុប បានបន្តកើនឡើងឥតស្រាកស្រាន្ត៕ ប្រភព៖ Metro